आज रवि लामिछानेको भैरहवामा दोस्रो दिनको लिखित बयान सुरू

रुपन्देही : सहकारीको रकम अपचलन आरोपमा पक्राउ परेका रास्वपा सभापति तथा पूर्वगृहमन्त्री रवि लामिछानेलाई आज दोस्रो दिन बयानको लागि जिल्ला सरकारी वकिलको कार्यालयमा रुपन्देही उपस्थित गराइएको छ ।

मंगलबार पोखराबाट ल्याएर साढे १२ बजेदेखि साँझ ६ बजेसम्म उनको मौखिक बयान लिइएको थियो । आज भने लिखित रूपमै प्रश्न राखेर बयान लिइने बताइएको छ । रविको दोस्रो दिनको बयान सुरू भइसकेको छ ।

बुटवलमा सुप्रिम सहकारी ठगी प्रकरणको थप अनुसन्धान तथा बयानका लागि लामिछानेलाई कास्कीबाट हिजो रुपन्देही ल्याइएको थियो । बुटवलस्थित सुप्रिम बचत तथा ऋण सहकारी संस्थाको १४ करोड २९ लाख रूपैयाँ गोरखा मिडिया नेटवर्क प्रालिमा लगेर खर्च गरेको भन्दै लामिछानेविरुद्ध सङ्गठित ठगी गरेको आरोपमा अनुसन्धान भइरहेको छ ।

रविले आफूले सहकारीबाट रकम नलगेको बयान दिएका छन् । प्रहरीले यहाँबाट छिटो बयान सकेर रविलाई पठाउने जनाएको छ । सुप्रिम सहकारी ठगीको मुद्दा इलाका प्रहरी कार्यालय बुटवलले हेरिरहेकाले बयानमा पनि बुटवलकै प्रहरी अधिकृत रहेका छन् ।