धनगढी । धनगढीमा नेपाल बैंकका कर्मचारीद्वारा नगरप्रहरी र पत्रकारमाथि दुर्व्यवहार भएको छ ।
नगरपालिकाले पटकपटक जारी गरेको निर्देशन अटेर गरेको भन्दै कारबाहीका लागि धनगढीको भन्सार रोडस्थित बैंकको प्रदेश कार्यालय पुगेको नगरप्रहरीको टोली र कल २४ न्युजका सञ्चारकर्मी स्मृति केसी, सावित्री जोशी र सुबोध जोशीमाथि बैंकका कर्मचारीले दुर्व्यहार गरेका हुन् ।
यसो त बैंक रहेको भवनको सेफ्टी ट्यांकीबाट पानी चुहिएर सडक भरिनुका साथै आवतजावतमा समस्या भएपछि नगरपालिकाले बैंक र घरभेटीलाई तत्काल पानी चुहिने समस्या समाधान गर्न निर्देशन दिएको थियो ।
तर उक्त निर्देशनको अटेर गर्दै सेफ्टी ट्यांकीको पुनर्निमाणमा घरभेटी र बैंक दुवैले चासो नदेखाएपछि नगरपालिकाले सेफ्टी ट्यांकीमा ताला लगाउन खोज्दा विवाद चर्किएको नगरपालिकाका एक कर्मचारीले बताएका छन् ।
‘उहाँहरुको सेफ्टी ट्यांकी लिकेज थियो । लिकेज भएको पानी सडकभरी भरिन्थ्यो । स्थानीयको गुनासोपछि नगरपालिकाले पत्र नै पठायो तर पनि न सेफ्टी ट्यांकी मर्मत भयो न उहाँहरुले नगरपालिकाको निर्देशन मान्नुभयो’, ती कर्मचारीले भने, ‘हदै भएपछि जरिवानासमेत गरेका हौँ, त्यसपछि पनि सेफ्टी ट्यांकी मर्मत नभएपछि नगरप्रहरीको टोली ताला लगाउन गएको थियो ।’
तर ताला लगाउने क्रममा नगरप्रहरी र बैंकका कर्मचारीबीच विवाद भएको ती कर्मचारीले बताएका छन् । विवादकै क्रममा बैंकका कर्मचारीले नगरप्रहरीलाई दुर्व्यहार गर्नुका साथै सञ्चारकर्मीको क्यामेरासमेत खोसेका थिए ।
हाल बैंक रहेको उक्त भवनमा लिकेज भएको सेफ्टी ट्यांकी मर्मत गर्ने सहमति भएको उपमहानगरपालिकाले जनाएको छ ।
प्रतिक्रिया दिनुहोस्