काठमाडौँ : भारतीय चर्चित क्रिकेटरहरुलाई समेत उछिनेर नेपालका खेलाडीहरुले विश्वभरिका खेलाडीहरुको वरीयतामा ठूलो फड्को मारेका छन्।
अन्तरराष्ट्रिय क्रिकेट परिषद् (आईसीसी) ले सार्वजनिक गरेको पछिल्लो टी–२० आई वरीयताअनुसार ब्याटिङ र अलराउण्डरतर्फ नेपाली खेलाडीहरुले ठूलो उपलब्धि हासिल गरेका हुन्।
भारतीय राष्ट्रिय टोलीका ओपनर ब्याट्सम्यान शुभमन गिल र ईशान किशनलाई पछि पार्दै नेपाली राष्ट्रिय टोलीका कप्तान रोहित पौडेल ब्याटिङतर्फ ५४ औँ स्थानमा उक्लिएका छन्।
यसअघि ९० औँ स्थानमा रहेको पौडेलले एकैपटक ३६ स्थानको फड्को मार्दै आफ्नो वरीयता माथि उकासेका हुन्।
राष्ट्रिय टोलीका अलराउण्डर दीपेन्द्रसिंह ऐरीले पनि ब्याटिङतर्फ ३१ स्थानको फड्को मारेर विश्व वरीयताको ७०औँ स्थानमा उक्लिएका छन्।
अलराउण्डरतर्फ पनि ऐरीले ४८ स्थानको फड्को मार्दै २७औँ स्थानमा उक्लिएका छन्।
विश्व वरीयताको अलराउण्डरतर्फ नै कुशल मल्ल ३५औँ, गुलशन झा ७२औँ र करण केसी ८१औँ स्थानमा उक्लिएका छन्।
प्रतिक्रिया दिनुहोस्