मन्त्री ज्वालाले राजीनामा नदिएकोमा ओलीको आक्रोशः ‘नैतिकता नभएको मन्त्री, हुत्तिहारा प्रधानमन्त्री’

काठमाडौँ – प्रमुख प्रतिपक्ष दल नेकपा (एमाले) का अध्यक्ष केपी शर्मा ओलीले बालकुमारी घटनामा दोषी करार भौतिक पूर्वाधार तथा यातायातमन्त्री प्रकाश ज्वालाले राजीनामा नदिएकोमा आपत्ति जनाएका छन्।

ओलीले सरकार आफैले बनाएको जाँचबुझ आयोगले दोषी करार गर्दा पनि राजीनामा नदिने मन्त्री ज्वालालाई नैतिकता हराएको मन्त्री र त्यस्ता मन्त्रीलाई हटाउन नसक्ने प्रधानमन्त्री पुष्पकमल दाहाललाई हुत्तिहाराको संज्ञासमेत दिए।

पार्टी मुख्यालय च्यासलमा सुरु भएको पार्टी केन्द्रीय कमिटी बैठकमा बोल्दै उनले दुई जना मानिसको ज्यानसमेत गएको घटनामा दोषी करार मन्त्री ज्वालाले कुनै पनि हालतमा पदमा बसिरहन नमिल्ने बताए।

अध्यक्ष ओलीले सोही घटनालाई चित्रण गर्दै वर्तमान सरकारले लोकतन्त्रको मजाक उडाएको र लोकलाज पचाएको जिकिरसमेत गरे।

उनले भने, ‘दोषी हो मन्त्री भनेर तोकिएको छ। सरकारले नै बनाएको आयोगले मन्त्री दोषी हो। मन्त्रीको गलत क्रियाकलापले गर्दाखेरी त्यहाँ मान्छे मर्ने स्थिति आयो, तोकेर भनिएको छ। यस्तो सरकार छ कि मन्त्रीसँग नैतिकता भन्ने चिज नै छैन, न राजीनामा गर्छ,  न सरकारसँग, प्रधानमन्त्रीसँग हटाउने हुति छ। नैतिकता नभएको मन्त्री, हुत्तिहारा प्रधानमन्त्री।

आफैले बनाएको अयोगले दोषी करार गरेको छ, जुन दोषका कारणले मान्छेको ज्यान गएको छ, जसका कारण प्रहरीहरु कारबाहीमा परेका छन्। जुन दोषको कारणले त्यहाँ अप्रिय स्थिति सिर्जना भएको छ। मान्छेहरु घाइते भएका छन्। अनि त्यस्तो मन्त्री बसिरहन मिल्छ? लोकतन्त्रको यस्तो मजाक उठाउन मिल्छ? यो गठबन्धनले यही गरिराखेको छ। लोकलाज पनि छैन यो गठबन्धनलाई। यस्तो अवस्थामा हामी छौँ।’