काठमाडौं –प्रधानमन्त्री पुष्पकमल दाहालले आफूले जिम्मेवारी पूरा गर्न नसक्ने स्थिति आए पद ओगटेर नबस्ने बताएका छन् ।
मंगलबार कार्यभार सम्हालेको एक वर्ष पूरा भएको अवसरमा राष्ट्रका नाममा सम्बोधन गरेका उनले कार्यसम्पादनमा खरो उत्रन नसके पद ओगटिरहन नहुने बताए ।
उनले काम गरेर देखाउन नसक्ने मातहतका सबैलाई आफूले माफ नगर्ने र काम गरेर देखाउनैपर्ने दबाबमा सरकार रहेको बताए ।
दाहालले भने, ‘म आज जनतालाई साक्षी राखेर माननीय मन्त्रीहरूलाई पनि भन्न चाहन्छु, हामीलाई असफल हुने छुट छैन । कार्यसम्पादन कमजोर भएको अवस्थामा म कसैलाई माफ गर्नसक्ने अवस्था र मनस्थितिमा छैन । हामी सबै आ–आफ्नो भूमिकामाथि न्याय गर्नैपर्ने नैतिक दबाबमा छौँ ।’
उनले थपे, ‘कार्यक्षमता प्रमाणित गर्न सकेनौँ भने कसैले पनि अब ठाउँ ओगटिरहनु हुँदैन, छाडिदिनुपर्छ । यो मैले अरूलाई दिएको उपदेश मात्र होइन, आफैँसँग गरेको वाचा पनि हो । देशमा सकारात्मक परिवर्तन र आशा जगाउन नसके मैले पनि पद ओगटिरहन जरुरी छैन ।’
प्रतिक्रिया दिनुहोस्