धनगढी : पुर्खौली घर डोटी भई हाल कैलालीका विभिन्न स्थानमा बसोबास गर्दै आएका डोटेली समुदायलाई एकताबद्ध गर्ने, भाइचारा अभिवृद्धि गर्ने र सांस्कृतिक पहिचान जोगाउने उद्देश्यले स्थापित ‘डोटेली समाज कैलाली’ को नाममा फेसबुकमा सञ्चालित पेज भने आफ्नो मूल उद्देश्यभन्दा बाहिर गएर सस्तो प्रचारबाजीको थलो बनेको छ।
कैलालीलाई कर्मथलो बनाएका डोटेलीहरूबीच आपसी मेलमिलाप र चाडपर्वहरूमा ऐक्यबद्धता कायम गर्न भन्दै बनाइएको उक्त पेजमा अचेल सामाजिक एकता वा संस्कृति प्रवर्द्धनका सामग्रीभन्दा बढी सनसनीपूर्ण भिडियो, ‘ब्रेकिङ न्युज’ र राजनीतिक स्टन्टहरू पोस्ट हुने गरेका छन्। कुनै आधिकारिक सञ्चारमाध्यम जस्तै गरी पस्किएका यी सामग्रीहरूले संस्थाको मर्म र मर्यादामाथि नै प्रश्न उठाएको स्थानीयको गुनासो छ।
पेजको मुख्य पृष्ठमा ‘डोटेली समाज कैलाली जनताको आवाज’ लेखिए पनि त्यसमा राखिएका अधिकांश ‘रिल्स’ तथा भिडियोहरू भने सस्तो लोकप्रियता र भ्युज कमाउने उद्देश्यले प्रेरित देखिन्छन्। सर्वसाधारणलाई जोड्ने साझा चौतारी हुनुपर्ने पेजबाट तथ्यहीन र भ्रामक समाचारको शैलीमा सामग्री सम्प्रेषण भइरहँदा समेत समाजका जिम्मेवार पदाधिकारीहरू भने बेखबर जस्तै बनेका छन्।
उक्त फेसबुक पेज कसले र कुन नियतले चलाइरहेको छ भन्ने विषयमा स्वयम् डोटेली समाजका सदस्यहरू नै अनभिज्ञ छन्। संस्थाको नाम र लोगो प्रयोग गरेर गैर-जिम्मेवार सामग्री निरन्तर पोस्ट भइरहँदा पनि कार्यसमितिले कुनै चासो नदेखाएको भन्दै सर्वसाधारणले नेतृत्वको भूमिकामाथि नै आशङ्का व्यक्त गर्न थालेका छन्।
साझा पहिचान र भावनात्मक एकतासँग जोडिएको संस्थाको नाम दुरुपयोग गरेर भ्रामक प्रचार गर्ने कार्यले सिङ्गो डोटेली समुदायको साख गिर्न सक्ने खतरा बढेको छ। त्यसैले उक्त पेजको आधिकारिकता स्पष्ट पार्न, अनर्गल सामग्री सम्प्रेषण रोक्न र यदि अनाधिकृत रूपमा संस्थाको नाम प्रयोग गरिएको भए कानुनी कारबाहीको प्रक्रिया अघि बढाउन स्थानीयले समाजका पदाधिकारीहरूसँग माग गरेका छन्।
प्रतिक्रिया दिनुहोस्