३ भदौ, काठमाडौं । सदूरपश्चिम प्रदेशका मुख्यमन्त्री खगराज भट्टले सरकारको मूल प्राथमिकता सुशासन, दिगो विकास, उत्पादन, रोजगारी, जनताको बीचमा परिवर्तन गर्नेतर्फ लक्षित हुने बताएका छन् । विकास अब केही शहर र केही क्षेत्रमा मात्र केन्द्रित नहुने पनि उनले बताए ।
आज प्रदेश सभामा विश्वासको मत माग्ने क्रममा उनले सो जानकारी दिएका हुन् ।
‘पहाड, हिमाल र तराईलाई समान अवसर र समान प्राथमिकतासँग जोडेर सन्तुलित, समानुपातिक र समावेशी विकास सिद्धान्तलाई आत्मसात् गर्नेछु,’ उनले भने, ‘कुनै भूगोल, वर्ग, समुदाय वा नागरिकहरुको विकासको अवसरबाट उहाँलाई पछाडि पार्ने छैन ।’
विकासलाई केवल सडक, भवन र भौतिक संरचनासँग मात्र सीमित नराख्ने उनले प्रतिबद्धता जनाए ।
‘गुणस्तरीय शिक्षा, सर्वसुलभ स्वास्थ्य, खानेपानी, कृषि, रोजगारी, उद्यम र मानव विकासलाई विकासको मुख्य आधार बनाउने छौं,’ उनले भने, ‘भुइँ मान्छेहरुले सपना देख्न सक्ने, उनीहरुको जीवनलाई सम्बोधन गर्ने कुरा हाम्रो प्रस्थानविन्दु बनाएर अगाडि बढ्नेछौं ।’
प्रतिक्रिया दिनुहोस्