काठमाडौं– राष्ट्रिय स्वतन्त्र पार्टी (रास्वपा)ले आगामी स्थानीय तह निर्वाचनलाई लक्षित गर्दै उम्मेदवार छनोट प्रक्रिया अघि बढाउने भएको छ।
रास्वपाले आगामी भदौ १ गतेदेखि स्थानीय तहमा पार्टीका तर्फबाट उम्मेदवार बन्न इच्छुक व्यक्तिका लागि ‘क्यान्डिडेट क्लब’ को आवेदन खुला गर्ने तयारी गरेको छ। पार्टीका महामन्त्री विपिनकुमार आचार्यका अनुसार स्थानीय तह निर्वाचनमा उम्मेदवार बन्न इच्छुक व्यक्तिले उक्त क्लबमा आवेदन दिन सक्नेछन्।
जिम्मेवार, परिपक्व, योग्य र क्षमतावान व्यक्तिलाई स्थानीय तहको निर्वाचनमा उम्मेदवार बनाउनका लागि छनोटको यस्तो प्रक्रिया अघि बढाउन लागिएको आचार्यले बताए।
क्यान्डिडेट क्लबमा आवेदन दिएपछि उम्मेदवारले प्रारम्भिक छनोट प्रक्रिया पार गर्नुपर्नेछ। पालिका तहको निर्वाचनमा उम्मेदवार बन्न इच्छुक व्यक्तिले सम्बन्धित क्षेत्रका जनताको सहभागितामा हुने प्रारम्भिक छनोट प्रक्रियासमेत सामना गर्नुपर्ने रास्वपाको तयारी छ।
यसका लागि सम्बन्धित क्षेत्रका नागरिकले अनलाइनमार्फत मतदान गर्न सक्ने व्यवस्था ल्याउने तयारी गरिएको छ। पार्टीले उम्मेदवार छनोटमा पारदर्शिता र जनसहभागिता बढाउने उद्देश्यले यस्तो व्यवस्था गर्न लागेको जनाएको छ।
रास्वपाको तयारीअनुसार स्थानीय तहको उम्मेदवार बन्न इच्छुक व्यक्तिले पार्टीबाट टिकट पाउनुअघि दुईदेखि तीन चरणको छनोट प्रक्रिया पार गर्नुपर्नेछ। त्यसपछि मात्रै अन्तिम उम्मेदवारका रूपमा टिकट दिने व्यवस्था गरिने पार्टीले जनाएको छ।
प्रतिक्रिया दिनुहोस्