जिल्ला प्रहरी कार्यालय बाजुराका अनुसार मंगलबार दिउँसो करिब ४:४० बजे सडकमा हिँडिरहेका बडिमालिका–७ निवासी रामबहादुर विकका १४ वर्षीय छोरा दिलिप विकलाई जीपले ठक्कर दिएको हो । दुर्घटनामा उनको टाउको र हातमा चोट लागेको छ ।
घाइते दिलिपलाई तत्काल आफन्तले उपचारका लागि जिल्ला अस्पताल मार्तडी पुर्याएका थिए । अस्पतालमा उनको उपचार भइरहेको र अवस्था मध्यम रहेको प्रहरीले जनाएको छ ।
दुर्घटनापछि फरार रहेको जीप र चालकको खोजीका लागि प्रहरी परिचालन गरिएको थियो । जिल्ला प्रहरी कार्यालय बाजुराबाट प्रहरी नायब उपरीक्षकको कमाण्डमा टोली खटिएको थियो भने थप अनुसन्धानका लागि प्रहरी निरीक्षक नरेशबहादुर शाहीको नेतृत्वमा अर्को टोली परिचालन गरिएको थियो ।
प्रहरीले राति ९:२५ बजे बडिमालिका नगरपालिका–९ मार्तडी बजारबाट भे १ च ४०८० नम्बरको जीप फेला पारी नियन्त्रणमा लिएको छ । जीप चालक सल्यानको बागचौर नगरपालिका–७ निवासी २४ वर्षीय गोपाल वलीलाई पनि पक्राउ गरिएको प्रहरी निरीक्षक शाहीले जानकारी दिए ।
घटनाबारे थप अनुसन्धान भइरहेको प्रहरी निरीक्षक शाहीले बताए ।
प्रतिक्रिया दिनुहोस्