१२ वटै संसदीय समितिका सभापतिहरूले भेटे सभामुख

७ वैशाख, काठमाडौं । संसदीय समितिका नवनिर्वाचित सभापतिहरुले आज सम्माननीय सभामुख डोलप्रसाद अर्याललाई भेट गरेका छन् । प्रतिनिधिसभाका १० र संयुक्त २ गरी १२ वटा समितिका सभापतिले आज सोमबार सभामुख अर्याललाई भेटेका हुन् ।

भेटमा सभामुख अर्यालले मिनी संसद्को रुपमा रहने संसदीय समितिलाई प्रभावकारी रुपमा सञ्चालन गरी अघि बढाउन निर्देशन दिए ।

दलीय प्रतिनिधित्व गरेर निर्वाचित भए पनि समितिमा हुने कामकारबाहीमा दलको आस्था र प्रभाव नदेखाउन उनले आग्रह गरे । उनले संघीय संसद् सचिवालय र आफूले समितिहरूलाई सधैँ सहयोग गरिरहने पनि बताए ।

समिति सभापतिहरुले पनि आफूहरुले प्राप्त गरेको जिम्मेवारी कुशलतापूर्वक निर्वाह गर्ने प्रतिवद्धता जनाए । उनीहरूले पुराना असल अभ्यासहरुलाई निरन्तरता दिँदै नवीन ढंगबाट संसदीय मूल्य र मान्यतालाई आत्मसाथ गर्दै समितिका गतिबिधीहरुलाई अघि बढाउने बताए ।