काठमाडौं — राष्ट्रिय जनमोर्चा नेपाल का अध्यक्ष चित्रबहादुर केसी ले विदेशमा रहेका नेपालीहरूलाई CIA ले प्रभावमा पारेर ‘घण्टी’ चिन्हमा मतदान गर्न दबाब दिएको दाबी गरेका छन्। सोमबार आयोजित पत्रकार सम्मेलनमा उनले यस्तो गतिविधिलाई “लाजमर्दो अवस्था” को संज्ञा दिएका हुन्।
केसीका अनुसार रोजगारी वा अध्ययनका लागि विदेश गएका नेपालीहरू स्वतन्त्र नरहेको र उनीहरूलाई आफ्ना परिवारलाई समेत निश्चित चिन्हमा भोट हाल्न दबाब दिन लगाइएको आरोप लगाए। “विदेशमा रहेका नेपालीहरूलाई नियन्त्रणमा राखेर आफ्नै अभिभावकलाई फोनमार्फत भोटका लागि दबाब दिन लगाइएको छ,” उनले भने।
उनले देशभित्रको राजनीतिक अवस्थाप्रति पनि असन्तुष्टि जनाउँदै सिंहदरबार, सर्वोच्च अदालत र संसद्जस्ता संस्थामाथि आक्रमण गर्ने प्रवृत्ति बढेको टिप्पणी गरे। “जनताले सधैँ सही निर्णय गर्छन् भन्ने हुँदैन,” भन्दै उनले वर्तमान अवस्थालाई चिन्ताजनक बताएका छन्।
केसीले देशलाई यो स्थितिमा ल्याउन ‘कम्युनिस्ट नामका शक्तिहरू’ जिम्मेवार रहेको आरोप पनि लगाए। साथै, उनले सबै राजनीतिक दलका नेतासँग देशको वर्तमान संकटबारे छलफल गर्ने योजना रहेको बताए।
उनले नेपालमा भइरहेको राजनीतिक गतिविधिलाई अन्तर्राष्ट्रिय शक्ति संघर्षसँग जोड्दै संयुक्त राज्य अमेरिका ले चीन विरुद्ध रणनीतिक रूपमा यस्तो परिस्थिति सिर्जना गरेको दाबी गरे। यसै क्रममा उनले दलाई लामा लाई पुनर्स्थापित गर्ने उद्देश्यले पनि यस्तो खेल भइरहेको आरोप लगाए।
अन्त्यमा, प्रत्यक्ष कार्यकारी प्रणालीको बहसलाई उल्लेख गर्दै उनले डोनाल्ड ट्रम्प को उदाहरण दिँदै “जनताले सधैँ सही निर्णय गर्छन् भन्ने मान्यता सधैँ लागू नहुने” धारणा व्यक्त गरे।
प्रतिक्रिया दिनुहोस्