धनगढी – कैलाली क्षेत्र नम्बर ५ मा सम्पन्न प्रतिनिधि सभा सदस्य निर्वाचनसँग सम्बन्धित एक गम्भीर आरोप सार्वजनिक भएको छ। नेपाली काँग्रेसका तर्फबाट उम्मेदवार रहेका नरनारायण शाहले आफ्नै पार्टीका केही नेताहरूले चुनावका बेला विपक्षी उम्मेदवारबाट आर्थिक लाभ लिएको दाबी गरेका छन्।
शाहका अनुसार नेपाली कम्युनिस्ट पार्टीका उम्मेदवार प्रेमबहादुर आलेले नै आफूलाई भेटेर रकम लिने ५७ जना काँग्रेस निकट व्यक्तिहरूको सूची उपलब्ध गराएको बताएका छन्। उनले पार्टीभित्रकै नेतृत्व तहका व्यक्तिहरू समेत यसमा संलग्न रहेको संकेत गरेका छन्।
यद्यपि, उनले ती व्यक्तिहरूको नाम भने सार्वजनिक गर्न अस्वीकार गरेका छन्। नाम सार्वजनिक गरे पार्टीभित्र ठूलो विवाद सिर्जना हुने र संगठन नै प्रभावित हुन सक्ने उनको भनाइ छ। रकमको परिमाण र कसले कति लिएको भन्ने विवरण पनि खुलाइएको छैन।
उक्त दाबी सार्वजनिक भएसँगै सामाजिक सञ्जालमा व्यापक चर्चा सुरु भएको छ। प्रयोगकर्ताहरूले आरोपित व्यक्तिहरूको पहिचान सार्वजनिक गर्न माग गरिरहेका छन्।
उक्त निर्वाचनमा राष्ट्रिय स्वतन्त्र पार्टीका उम्मेदवार चन्द विजयी भएका थिए। उनले ३१ हजार ९५३ मत प्राप्त गरेका थिए भने काँग्रेसका शाहले ११ हजार ९५८ मत ल्याएका थिए। प्रेमबहादुर आले भने ७ हजार ८७६ मतसहित तेस्रो स्थानमा सीमित भएका थिए।
हालसम्म आरोपबारे अन्य पक्षबाट आधिकारिक प्रतिक्रिया भने सार्वजनिक भएको छैन।
प्रतिक्रिया दिनुहोस्