डडेल्धुरामा चुनावी सरगर्मीः विभाजित मत एक ठाउँमा उभिएपछि बलियो बन्यो काँग्रेस !

धनगढी । देउवा नहुँदा डडेल्धुरामा काँग्रेसको विरासत भत्किन्छ भन्ने चर्चा चलेका बेला नैनसिंह महरको उपस्थिति र सक्रियताले माहोल झनै तातेको छ । अझ यसअघि देउवा नेतृत्वको काँग्रेसबाट अलग्गिएको बिपी काँग्रेस पनि पुरानै अवस्थामा फर्किएपछि डडेल्धुरामा काँग्रेसको सम्भावना झनै बलियो भएको छ ।

लामो समयसम्म देउवा नेतृत्वको काँग्रेसबाट अलग्गिएको बिपी काँग्रेस विशेष महाधिवेशनबाट गगन थापा सभापति बनेपछि गगनकै आह्वानमा पुनः पुरानै अवस्थामा फर्किएको छ ।

प्रभावशाली नेताका रुपमा परिचित कर्ण मल्लसहितको बिपी काँग्रेसले समर्थन गरेपछि डडेल्धुरामा महरलाई थप सहज भएको विश्लेषण गरिएको छ ।

स्थानीय नेताहरुका अनुसार बिपी काँग्रेसको साथ पाएपछि महरको पक्षमा जनमत थप बलियो बन्दै गएको छ । स्थानीय स्तरमा कार्यकर्तामा उत्साह देखिएको छ भने घरदैलो र प्रचारप्रसारमा समेत नयाँ उर्जा देखिएको छ ।

विश्लेषकहरूका अनुसार विभाजित मत एक ठाउँमा उभिने संकेत देखिएकाले प्रतिस्पर्धा झनै रोचक बनेको छ । महरको उम्मेदवारी अब बलियो आधारमा उभिएको आकलन गर्न सुरु भएको छ ।