नेकपा एमाले कास्की क्षेत्र नम्बर १ का उम्मेदवार वैनबहादुर अधिकारी क्षेत्रीको चुनावी अभियानमा प्रयोग भएको दुई वटा गाडीमा ढुंगा प्रहार भएको छ ।
आफ्नो चुनावी अभियानका क्रममा मादी–११ उपल्लो साप्लेमा कार्यक्रम भइरहँदा तरुण दल सम्बद्ध युवाहरुले ग.४ च.१०१५ र बा.९ च.८९ नम्बरको दुई वटा कारमा ढुंगा प्रहार गरेको उम्मेदवार अधिकारीले बताए । उनका अनुसार स्थानीय तरुण दलका नेता रिदम गुरुङलगायतका चार जनाको समूहले गाडीमा तोडफोड गरेका हुन् ।
चुनावी अभियानमा सहभागी हुन पोखरा पव्लिक स्कुलका फाउण्डर कृष्ण केसीलगायत चढेर गएको गाडी पार्किङमा राखेको बेला कांग्रेसको हवाला दिँदै गाडीमा प्रहार गरेको एमाले मादी गाउँपालिका अध्यक्ष सुवास सापकोटाले बताए । उनका अनुसार गाडीका सिसाहरु फुटेका छन् भने ढोकामासमेत क्षती पुगेको छ ।
उम्मेदवार अधिकारीले दोषीमाथि कडा कारवाही गर्न माग गरेका छन् । घटनाबाट आफू कत्तिपनि विचलित नभएको बताउँदै उनले भने, ‘केही आवारा तरुण दलका कार्यकर्ताले आक्रमण गर्दैमा डराउने मान्छे होईन म । तर सुरक्षा चुनौती देखापरेको छ । राज्यले तुरुन्त पक्राउ गरेर उनीहरुलाई कारवाही गरोस् ।’
प्रतिक्रिया दिनुहोस्