सुर्खेत । नेपाली कांग्रेस कर्णाली प्रदेशका उपसभापति विष्णुबहादुर खड्काले कर्णालीमा पार्टी एक ढिक्का भएको चुनावी मैदानमा होमिएको दाबी गरेका छन् ।
सुर्खेत १ का उम्मेदवार समेत रहेका खड्काले सुर्खेतमा आयोजना गरेको चुनावी सभाको सम्बोधन गर्दै कर्णालीका १० ओटै निर्वाचन क्षेत्रमा कांग्रेसप्रति जनलहर आएकाले सबैमा चुनाव जित्ने दाबी गरे ।
उनले नेकपा एमाले, नेकपा र रास्वपा लगायतका राजनीतिक दलले कांग्रेस विभाजित भएको भन्ने गलत भाष्य बनाएर जनतामा भ्रम छर्ने काम गरेको र यो लगत भएको बताए ।
कांग्रेसका पूर्व कार्यवाहक सभापति पूर्णबहादुर खड्काका भाइसमेत रहेका खड्काले भने, ‘हाम्रो पार्टी अहिले एक ढिका भएर चुनावमा होमिएको छ । कुनै समस्या छैन । बाहिर आएको हल्ला हामीलाई कमजोर बनाउने हल्ला मात्रै हो । यसको पछाडि नलागीकन रूख चिन्हमा भोट हालेर कांग्रेसलाई विजय गराऔँ ।’
उनले आफू सुर्खेत १ को उम्मेदवार भए पनि यस क्षेत्रबाट कांग्रेसबाट चुनावी प्रतिस्पर्धामा रहेका सबैलाई जिताउन आफ्नो तर्फबाट काम गर्ने प्रतिबद्धता व्यक्त गरेका छन् ।
खड्काले जेनजी आन्दोलनपछि बदलिएर देश बदल्ने हुटहुटीसहित निर्वाचनमा होमिएको कांग्रेसलाई सहयोग गर्नसमेत आग्रह गरे ।
प्रतिक्रिया दिनुहोस्