धनगढी । जग्गा सम्बन्धी कामका लागि घण्टौँ मालपोत कार्यालय धाउनुपर्ने बाध्यताको अन्त्य हुने भएको छ । भूमि प्रशासनका सेवा स्थानीय तहबाटै प्रवाह गर्ने तयारी अघि बढेसँगै अब जग्गा सम्बन्धी कामका लागि मालपोत कार्यालय धाउनुपर्ने र लामो लाइन बस्नुपर्ने बाध्यताको अन्त्य हुने भएको हो ।
अहिले कैलालीका स्थानीय तहबाटै भूमि प्रशासनका सेवा सुरु गर्ने तयारीस्वरुप धनगढीमा भू–सूचना प्रणाली सम्बन्धी दुई दिने तालिम सञ्चालन गरिएको छ ।
संघीय भूमि व्यवस्था तथा गरिबी निवारण मन्त्रालयको आयोजनामा भएको तालिममा धनगढी उपमहानगरपालिकासहित कैलालीका सात स्थानीय तह र कञ्चनपुरका केही स्थानीय तहका कर्मचारी सहभागी भएका थिए । तालिममा ४३ जना कर्मचारीको सहभागिता रहेको थियो ।
भूमि व्यवस्थापन तथा अभिलेख विभागका प्रवक्ता हरिप्रसाद पन्तका अनुसार मालपोतबाट प्रदान हुँदै आएका लिखत पारित र नामसारीजस्ता सेवा क्रमशः स्थानीय तहबाटै सुरु गर्ने लक्ष्य राखिएको छ ।
तालिमपछि केही भूमि प्रशासन सम्बन्धी सेवा स्थानीय तहबाटै उपलब्ध गराइने बताइएको छ ।
प्रतिक्रिया दिनुहोस्