प्रचण्डको एकता प्रस्तावमा विप्लवको टिप्पणी : यो थोत्रो जालझेल र बासी हुइयाँ मात्र

काठमाडौं : नेपाल कम्युनिष्ट पार्टी (नेकपा) का महासचिव नेत्रविक्रम चन्द ‘विप्लव’ ले कम्युनिष्ट एकताका नाममा राजनीतिक जालझेल भइरहेको टिप्पणी गरेका छन् । नेकपा संयोजक पुष्पकमल दाहाल ‘प्रचण्ड’ ले हालै सबै माओवादी शक्तिहरूलाई एकताको प्रक्रियामा आउन गरेको आह्वानप्रति लक्षित गर्दै विप्लवले यस्तो कडा प्रतिक्रिया दिएका हुन् ।

सामाजिक सञ्जालमार्फत आफ्नो धारणा सार्वजनिक गर्दै महासचिव विप्लवले कम्युनिष्ट आन्दोलन र एकताका सन्दर्भमा आफ्नो पार्टीको धारणा स्पष्ट पारेका छन् । उनले चुनावी मोर्चामा समेत सहकार्य गर्न तयार नहुनेहरूले एकताको कुरा गर्नु ‘बासी र असफल हुइयाँ’ मात्र भएको दाबी गरे ।

प्रचण्डको एकता प्रस्तावलाई कटाक्ष गर्दै विप्लवले लेखेका छन्, ‘आज चुनावी मोर्चामा समेत सहकार्य गर्न तयार नहुने पार्टीले एकताको चर्चा गर्नु कम्युनिष्ट आन्दोलनमा प्रयोग गर्दा गर्दा थोत्रो भइसकेको काम नलाग्ने जालझेलको बासी र असफल हुइयाँ मात्र हो ।’