नेपाली कांग्रेसका महामन्त्री विश्वप्रकाश शर्माले पार्टी विभाजन नहुने दोहोर्याएका छन् । विशेष महाधिवेशनको तयारी अवलोकनका लागि काठमाडाैंको भृकुटीमण्डप पुगेका महामन्त्री शर्माले सबैलाई मिलाउने प्रयास भइरहेकोले विशेष महाधिवेशनकै कारण कांग्रेस विभाजन नहुनेमा ढुक्क रहन आग्रह गरे ।
उनले विशेष महाधिवेशनपछि कांग्रेस एकजुट भएर २१ फागुनको चुनावमा जाने बताए । ‘विशेष महाधिवेशनले पार्टी विभाजन हुन्छ भने त्यो व्यवस्था पार्टी विधानमा लेखिने थिएन । पार्टी विभाजन हुँदैन । २१ फागुनको चुनावमा कांग्रेस एक भएर चुनावमा जान्छ । १६५ क्षेत्रमा कांग्रेसको एकल उम्मेदवार हुन्छ’, शर्माले भने ।
विशेष महाधिवेशनले नयाँ नेतृत्व चयन गर्छ भन्ने पत्रकारको प्रश्नमा शर्माले भने, ‘विशेष महाधिवेशनले कार्यविधि निर्माण गर्छ । त्यसले तय गर्छ ।
उनले केही साथीहरूले विशेष महाधिवेशनको हस्ताक्षरबाट नाम फिर्ता लिए पनि थपिनेको संख्या धेरै रहेको दाबी गरे ।
‘२३-२४ जनाले फिर्ता लिए पनि २ सय ५० जना थप साथीले (हिजो र अस्तिबाहेक) थप गर्नुभएको छ’, शर्माले भने । शर्मासँगै कांग्रेस नेताहरू चन्द्र भण्डारी र सुनिल शर्मा तयारी अवलकोकनका लागि भृकुटीमण्डप पुगेका थिए । भण्डारी र शर्माले पनि कांग्रेस विभाजन नहुने प्रस्ट पारे ।
प्रतिक्रिया दिनुहोस्