धनगढी । काठमाडौँमा अहिले नेकपा एमालेको महाधिवेशनको चहलपहल बढेको छ । पार्टीको ११औँ महाधिवेशनका लागि अहिले काठमाडौँमा जिल्ला जिल्लाबाट महाधिवेशन प्रतिनिधि आउने क्रम बढेको छ ।
महाधिवेशनका लागि काठमाडौँ आउने नेताहरुको क्रम बढेसँगै जिल्लास्तरीय नेता तथा कार्यकर्तालाई खान र बस्नकै चिन्ताले सताउन थालेको छ ।
अहिले विभिन्न जिल्लाबाट महाधिवेशनका लागि पुगेकाहरु कोही होटलमा बसेका छन् भने कोही खान र बस्नको लागि पार्टी नेतृत्वकहाँ हारगुहार गर्न पुगेका छन् ।
त्यसो त एमालेले महाधिवेशनका लागि काठमाडौँ आउने महाधिवेशन प्रतिनिधिले आफ्नो खान र बस्नको व्यवस्था आफैँ गर्नुपर्ने निर्णय गरेको छ । पार्टीको सो निर्णयले एमालेका प्रतिनिधिलाई थप तनाव दिएको छ ।
पैसा हुनेहरु आफैँ होटलमा गएर बसेका छन् । कोही आफन्तकोमा बस्न गएका छन् । तर काठमाडौँमा आफन्त नहुने र खर्च म्यानेज गर्न नसक्नेहरु भने पार्टी नेतृत्वकै भर पर्नुपर्ने बाध्यतामा छन् ।
अहिले राती परिसक्दा पनि महाधिवेशनका लागि काठमाडौँ आएकाहरु पार्टीको केन्द्रीय कार्यालय वरिपरी देखिएका छन् । सोही भीडमा एकजनाले भन्दै थिए, ‘दिनको २ ३ हजार खर्च आउने भयो । कसरी म्यानेज गर्ने ? गाह्रो पर्ने भयो यार ।’
यसले महाधिवेशनका लागि भनेरै काठमाडौँ आएका एमालेका महाधिवेशन प्रतिनिधिहरु थप मर्कामा परेको देखिएको छ ।
प्रतिक्रिया दिनुहोस्