तथ्य–प्रमाणले गृहमन्त्रीलाई छोएको छैन, रिस उठेका भरमा राजीनामा मागियो : प्रधानमन्त्री

प्रधानमन्त्री केपी शर्मा ओलीले केही आधार र प्रमाणबिनै गृहमन्त्री रमेश लेखकको राजीनामा मागिएको बताएका छन्।

सोमबार एमाले संसदीय दलको बानेश्वरमा बसेको बैठकलाई सम्बोधन गर्दै तथ्य, प्रमाण केहीले पनि गृहमन्त्रीलाई नछुने दाबी गरे।

ओलीले भने, ‘अहिले केही नपाएर गृहमन्त्रीको राजीनामा। केही तथ्य, केही प्रमाणले गृहमन्त्रीलाई छुनुपर्‍यो।’ अख्तियारले एउटा कर्मचारीको बयान लिएको आधारमा गृहमन्त्रीको राजीनामा माग गरिएको समेत उनले टिप्पणी गरे।

‘केहीले छोएको छैन, केही भएको छैन,’ ओलीले भने, ‘एउटा कर्मचारीलाई अख्तियारले बोलाएर सोध्योअरे भनेका भरमा, के सोधेको पनि थाहा छैन। बयान लिएको छैन। त्यस्तो अवस्थामा हामीलाई रिस उठेको छ गृहमन्त्रीको, त्यसकारण राजीनामा गर्नुपर्‍यो।’

भिजिट भिसा प्रकरणमा गृहमन्त्री लेखक मुछिएको भन्दै प्रमुख प्रतिपक्षी नेकपा माओवादी केन्द्रसहितका विपक्षी दलले उनको राजीनामा मागेर संसद् अवरोध गरिरहेका छन्।

ओलीले यसरी संसद् अवरोध नचल्ने भन्दै सांसदहरुलाई त्यसै अनुसार तयार रहन समेत निर्देशन दिए। ‘यस्तो कुराले संसद् अवरोध हुँदैन,’ ओलीले भने, ‘तपाईंहरु मानसिकरुपमा तयार हुनुहोस्। यसरी संसद् अवरोध चल्दैन यो।’