स्थानीय सेवा ऐन जारी गर्न माग गर्दै सुदूरपश्चिमका स्थानीय तहका कर्मचारी आन्दोलनमा

काठमाडौँ : सुदूरपश्चिमका ८८ वटै स्थानीय तहका कर्मचारी धनगढी केन्द्रित आन्दोलनमा उत्रिएका छन् ।

स्थानीय सेवा ऐन यथाशीघ्र जारी गर्न माग गर्दै कर्मचारी प्रदेश संघर्ष समितिको आयोजनामा प्रदर्शन भएको हो ।

धनगढीको पार्कमोडबाट आन्दोलन सुरु गर्दै मुख्यमन्त्री कार्यालयअगाडि गएर कर्मचारीहरू धर्ना बसेका छन् ।

आफ्ना माग सम्बोधन गर्न प्रदेश सरकारलाई पटक पटक आग्रह गरे पनि बेवास्ता गरेको उनीहरूको गुनासो छ । यस पटक माग सम्बोधन नभए कुनै पनि कर्मचारी स्थानीय तहका कार्यालयमा हाजिर नहुने चेतावनीसमेत दिएका छन् ।

अन्य प्रदेशले स्थानीय सेवा ऐन बनाएर लागू गरिसक्दा सुदूरपश्चिमले ऐन जारी गर्न नसकेको उनीहरूको भनाई छ । ऐन नबन्दा कर्मचारीको सरुवा, बढुवादेखि अन्य वृत्ति विकासमा समस्या भएको उनीहरूले बताए ।

२०८० देखि ऐन जारी गर्न माग राखे पनि समयमा सम्बोधन नहुँदा आन्दोलनमा उत्रिनुपरेको उनीहरू बताउँछन् ।

सरकारले यथाशीघ्र ऐन जारी नगरे सबै स्थानीय तहमा तालाबन्दी गरेर आन्दोलन लम्ब्याउने कर्मचारीको भनाइ छ ।