देउवाले उद्घाटन गरेको सुदूरपश्चिमको प्रथम प्रदेश सम्मेलन शेखरले गरे बहिष्कार

काठमाडौं : नेपाली कांग्रेसको सुदूरपश्चिम प्रदेशको प्रथम प्रदेश सम्मेलन सुरु भएको छ । पार्टी सभापति शेरबहादुर देउवाले उक्त सम्मेलनको आज उद्घाटन गरेका हुन् । धनगढीमा सुरु भएको उक्त सम्मेलनमा पार्टीका प्रायः सबै नेताहरुको उपस्थिति छ ।

तर, १५औं महाधिवेशनमा सभापतिको दाबेदार मानिएका र १४औं महाधिवेशनमा सभापतिमा देउवासँग पराजित डा. शेखर कोइराला भने सहभागी छैनन् । पछिल्लो समय उनले पार्टीका प्रदेशस्तरीय भेलाहरु बहिष्कार गर्दै आएका छन् । पोखराको भेलामा त उनलाई निम्तोसमेत नगरिएको दाबी गरिएको थियो ।

बुटवलमा निम्तो दिईएपनि नेताबाट निम्तो नगई कर्मचारीले मात्रै पठाएको भन्दै शेखरले आक्रोश पोखेका थिए । आजको सुदूरपश्चिम प्रथम प्रदेश सम्मेलनमा सभापति देउवासँगै उपसभापति पूर्णबहादुर खड्का, महामन्त्री गगनकुमार थापालगायतको उपस्थिति छ ।

नेताहरु डा. शशांक कोइराला, कृष्ण सिटौला, गोपालमान श्रेष्ठ, वीरबहादुर बलायर, डिना उपाध्यायलगायत आजको सम्मेलनमा सहभागी छन् । तर, शेखर पक्षका नेताहरु भने देखिएका छैनन् ।