कुलमानलाई लखेटे हजारौँ कुलमान आउँछन् : रास्वपा

काठमाडौं : राष्ट्रिय स्वतन्त्र पार्टी (रास्वपा)का सांसद मनिष झाले नेपाल विद्युत् प्राधिकरणका कार्यकारी महाप्रबन्धक कुलमान घिसिङलाई सरकारले लखेटे हजारौँ कुलमान लिएर आउने चेतावनी दिएका छन् । 

प्रतिनिधि सभाको बुधबार बसिरहेको बैठकमा सभामुख देवराज घिमिरेले दलीय आधारमा उपलब्ध गराएको समयमा बोल्दै उनले घिसिङलाई पदबाट हटाउनका लागि सरकारले गरिरहेको प्रयासको विरोधमा यस्तो चेतावनी दिएका हुन् ।

‘सार्वजनिक संस्थानमा राजनीतिक उपज के हुन्छ त्यो देखिराखेका छौँ । अर्कोतिर कुलमान घिसिङजस्तो कम्पनीलाई फाइदामा पुर्‍याउनेहरूलाई हामीले मूल्यांकन जिरोमा गर्छौँ । र, उसलाई विभिन्न बहानामा आफ्नो कार्यकर्ता भर्ती गर्न पाएन भनेर हामी निष्कासनको बहानाबाजी गरिरहेका छौँ,’ झाले भने, ‘विभिन्न परिपन्चहरू सिर्जना गरिराखेका छौँ । त्यसैले सरकारलाई खबरदार पनि भन्न चाहन्छौँ एउटा कुलमानलाई लेखट्यौँ भने हामी हजारौँ कुलमान लिएर आउने छौँ ।’