एक्टरमा प्रदीपको दोहोरो भूमिकामा !

काठमाडौं : आगामी माघ १६ गते रिलिज हुने फिल्म एक्टरः टेक वनको सशक्त गीत के भरोसा गरम सार्वजनिक गरिएको छ। गीतको भिडियोमा नायक प्रदीप खड्कालाई दुई नायिकाहरू आना शर्मा र दिव्या रायमाझीस“ग प्रेममा रहेको देखाइएको छ।

त्रिकोणात्मक प्रेमकथा दर्साइएको फिल्मको टिजरमा भने अभिनेताद्वय प्रदीप खड्का र राजबल्लभ कोइरालाका दृश्यले अर्कै संकेत गरेको थियो। गीतको भिडियोले फिल्ममा प्रदीप दोहोरो भूमिकामा त छैनन्? भन्ने कौतुहलता पनि पैदा गराएको छ।

अभिनेत्री आनास“गको दृश्यमा बोल्न सक्ने र दिव्यासँगको दृश्यमा बोल्न नसक्ने भूमिकाका दृश्य गीतमा प्रस्तुत गरिएको छ।
गीतमा हर्कुलस बस्नेत र इन्दिरा जोशीले स्वर दिएका छन् भने उर्मिला गुरुङको शब्द रचना र हर्कुलस बस्नेतको संगीतले गीतलाई सशक्त बनाएको छ। गीतमा किरण थापाले कोरियोग्राफी गरेका छन्।

फिल्मको निर्देशन राजन भुसालले गरेका हुन् भने स्क्रिप्ट आकाश बराल र राजन भुसालको सहकार्यमा तयार पारिएको छ। प्रदीप, आना र दिव्याका साथै राजबल्लभ कोइराला, दिव्य देव, उषा रजक, सृजना अधिकारी, सुशील सिटौलालगायतका कलाकारले अभिनय गरेको फिल्म अधृत फिल्म्स् र अ मोती फिल्मको संयुक्त ब्यानरमा थमन कुमार भण्डारीले निर्माण गरेका हुन्।

मोती कार्की क्रियटिभ निर्माता र अनीश भुसाल सह–निर्माता रहेको फिल्ममा हर्कुलस बस्नेत, रोहित शाक्य र एलिस कार्कीको संगीत, नरेन्द्र मैनालीको छायांकन र निमेष श्रेष्ठको सम्पादन रहेको छ।