धनगढीमा हार्डवेयर एक्सपो २०८० सुरु

धनगढी, १० असोज । धनगढीमा हार्डवेयर एक्सपो मेला सुरु भएको छ । कैलाली हार्डवेयर व्यवसायी संघको आयोजनामा बुधबार देखी हार्डवेयर एक्सपो २०८० सुरु भएको हो ।

कैलाली हार्डवेयर व्यवसायी संघका अनुसार संघका सदस्य भएका चार सय २५ वटा हार्डवेयर पसलहरुको दैनिक १२ देखि १५ करोड रुपैयाँको निर्माण सामग्री खरिदविक्री हुने अनुमान गरिएको छ । एक्सपोले यहाँको आर्थिक विकासमा टेवा पुग्ने अपेक्षा गरिएको छ ।

उद्योग वाणिज्य तथा उपभोक्ता हित संरक्षण कार्यालय कैलालीका अनुसार जिल्लाभित्र एक हजार ९ सय ५७ वटा हार्डवेयरका पसल दर्ता भएर सञ्चालनमा छन् । ती पसलहरुबाट दैनिक १५ देखि २० करोड रुपैयाँको निर्माण सामग्री विक्री हुने गरेको अनुमान छ।

प्रदेशभित्र निर्माण सामग्रीको खपत बढ्न थालेपछि उक्त हार्डवेयर एक्सपो–२०८० को तेस्रो श्रृंखला सुरु भएको हो । स्वदेश एवं विदेशी हार्यवेयर सामग्रीका विषयमा जानकारी दिने उद्देश्यले आजबाट १४ गतेसम्म धनगढीस्थित सौराई स्क्वायरमा प्रदर्शनी गरिने छ निःशुल्क प्रवेशको व्यवस्था गरिएको एक्सपोमा ५० भन्दा बढी कम्पनी तथा व्यवसायीक फर्मका स्टलहरु अवलोकन गर्न सकिनेछ ।

कैलालीमा मात्र वार्षिक पाँच अर्ब मुल्य बराबरको हार्डवेयरका सामग्रीको व्यापार हुने गरेको अनुमान छ । प्रदेशभर झण्डै वार्षिक ८ अर्बको यस्तो कारोबार हुने गरेको अनुमान व्यवसायीको छ ।