डोटीको बडीकेदारस्थित खड्यौलीमा बिजुली बल्यो

डोटी, ३० साउन । डोटीको बडीकेदार गाउँपालिकास्थित खड्यौलीमा बिजुली पुगेको छ । गाउँपालिकाका अध्यक्ष भैरव साउँदका अनुसार नेपाल विद्युत प्राधिकरण डोटीको ५२ लाख २४ हजार लगानीमा सोमवारबाट खड्यौलीमा बिजुली बलेको हो ।

नेपाल विद्युत प्राधिकरण डोटीका अनुसार ५२ लाख २४ हजारको लागतमा ११ दशमलव ४७ किलोमिटर विद्युत लाइन विस्तार गरिएको छ । उक्त पालिकाको सबै वडामा दुई वर्षभित्र बिजुली विस्तार गरिने नेपाल विद्युत प्राधिकरण प्रादेशिक कार्यालय, अत्तरियाका प्रमुख जंगबहादुर चन्दले बताए ।

बडीकेदार गाउँपालिकाका सबै वडामा बिजुली विस्तारका लागि साढे १२ करोडको ठेक्का सम्झौता गरिएको छ । निर्माण कम्पनीले दुई वर्षभित्र सबै वडामा विद्युत विस्तार गर्ने योजना छ ।