प्रकाश सुपतले ३८ दिनमा पुरा गरे बसन्त

काठमाडौं : अर्को साताबाट चलचित्र सोल्टिनीको छायाँकनमा जाने तयारीमा जुट्न लागेका अभिनेता एवम् गायक प्रकाश सपुतले आफ्नो चलचित्र बसन्तको भने छायांकन बल्ल पुरा गरेका छन् । बसन्त उनी आफैंले निर्माण तथा निर्देशन गरेको चलचित्र हो ।

बसन्तको सम्पुर्ण छायांकन सकिएको प्रकाशले जानकारी गराएका छन् । उनका अनुसार ३८ दिनमा यो चलचित्रको सम्पूर्ण छायांकन प्याकअप गरिएको हो । बुधबार बसन्तको अन्तिम सट खिच्दै काठमाडौंमा इन्डक्ल्याप गरिएको छ ।

यो चलचित्रलाई आगामी २२ चैत्रमा पर्ने चैते दशैंको अवसर पारेर प्रदर्शनको तयारीमा आफु रहेको पनि प्रकाशले बताएका छन् । गायक तथा निर्देशक प्रकाशको जन्मथलो बागलुङ, काठमाडौं र तराईका विभिन्न ठाउँमा यो चलचित्रको छायांकन गरिएको छ ।

चलचित्र बसन्तमा प्रकाश सपुत सपुतसँगै स्वस्तिमा खड्का, प्रभात पाल ठकुरी, खड्क बहादुर पुन (खबपु), शिवांशी श्री, अनुप बराल, कमलमणी नेपाल, प्रकाश घिमिरेलगायतका कलाकारको अभिनय रहेको छ । यो सामाजिक कथामा निर्माण गरिएको चलचित्र भएको पनि उनले बताए ।

बसन्तको कथा, पटकथा र संगीत पनि प्रकाशले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा बसन्तमा समेटिएको पनि प्रकाशको कथन छ ।

गलबन्दी प्रोडक्सनको प्रस्तुति रहने यो चलचित्रको कार्यकारी निर्मातामा मोहन विश्वकर्मा, अनुरोध भट्टराई र नाना थकाली छन् । यो चलचित्रको छायांकारमा सुसन प्रजापति रहेका छन् ।