लुम्बिनी लायन्सलाई ४५ रनले हराउँदै सुदूरपश्चिमले तेस्रो जित हाँसिल गर्यो !

काठमाडौं : सिद्धार्थ बैंक नेपाल प्रिमियर लिग(एनपिएल)मा सुदूरपश्चिम रोयल्सले लगातार तेस्रो जित निकालेको छ ।

शनिवार लुम्बिनी लायन्सलाई ४५ रनले हराउँदै सुदूरपश्चिम रोयल्सले लगातार तेस्रो जित दर्ता गरेको हो ।

जितका लागि सुदूरपश्चिमले दिएको १८८ रनको लक्ष्य पछ्याएको लुम्बिनी लायन्स निर्धारित ओभरमा ९ विकेट गुमाउँदै १४२ रनमा समेटियो ।

लुम्बिनी लायन्सका लागि विवेक यादवबाहेक अन्य ब्याटरले दोहोरो अङ्कमा रन बनाउन सकेनन् । विवेकले ५४ बलमा ७७ रन बनाए । उनले ७ छक्का र ३ चौका हिर्काए ।

सन्दीप जोराले २० र दिनेश अधिकारीले १४ रन बनाउनु बाहेक अन्य ब्याटरले व्यक्तिगत १० रन पनि कटाउन सकेनन् ।

लुम्बिनीलाई सस्तैमा समेट्न ब्रान्डन मक्मेलन र सेफ जैबले सर्वाधिक ३–३ विकेट लिए । स्कट कुग्गेलिजनले २ विकेट लिए भने अभिनाष बोहराले १ विकेट लिए ।

त्यसअघि टस हारेर पहिले ब्याटिङको निम्तो पाएको सुदूरपश्चिमले निर्धारित २० ओभरमा ४ विकेट गुमाएर एक सय ८७ रन बनायो ।

सुदूरपश्चिमका लागि सैब जायबले अर्धशतीय पारी खेले । उनले ६१ बलमा ५ छक्का र ६ चौकाको मद्दतले सर्वाधिक ९० रन बनाएका हुन् ।

दीपेन्द्र सिंह ऐरीले ३९, ब्राण्डोन म्याक मुलेनले २३, बिनोद भण्डारीले १७ र स्कट कुग्गेलिजनले ११ रनको योगदान दिए । सुदूरपश्चिमले अतिरिक्त ७ रन पायो ।

लुम्बिनीका लागि रामोन सिमन्ड्सले सर्वाधिक २ विकेट लिए । यस्तै, कप्तान रोहित पौडेल र विवेक यादवले समान १÷१ विकेट हात पारे ।