फिल्म ‘ममी’ आगामी माघ २५ गतेदेखि प्रदर्शनमा आउने

काठमाडौं : फिल्म ‘ममी’ आगामी माघ २५ गतेदेखि प्रदर्शनमा आउने भएको छ । 

मंगलबार निर्माण युनिटले फिल्मको फष्टलुक सार्वजनिक गर्दै माघ २५ गतेलाई प्रदर्शन मिति घोषणा गरेको हो । फष्टलुक एउटा ठुलो रुखको फेदमा घर अनि प्रियंका र दीयालाई सोही रुखको आकारमा प्रस्तुत गरिएको छ । 

पोस्टरमा प्रियंकालाई गम्भीर भावमा प्रस्तुत छिन्, भने दीयाको रगताम्य अनुहारसहित डरलाग्दो अवतारमा देख्न सकिन्छ । हरर फ्यामिली ड्रामा कथामा निर्माण भएको सिनेमाले एक परिवारमा छोरी र कुकुरको दुखद निधन पश्चात रहस्यमय कालो बिरालो अपनाएसँगै निम्तने विपत्तिलाई देखाउने छ ।

एसओ ट्वान्टी फाइभको प्रस्तुतिमा निर्माण भएको फिल्ममा प्रियंका र दीयासँगै सुलक्षण भारती, समीप निरौला, घनश्याम जोशी, आयुषी ढकाल, जेभिस श्रेष्ठ, गुराँस ढकाल, रिना ढकाल लगायत कलाकारको अभिनय देख्न सकिन्छ । 

समर निरौलाको लेखन तथा निर्देशन रहेको फिल्मको लोकराज जोशी र पूर्णिमा जोशी निर्माता अनि सुमन कोइराला कार्यकारी निर्माता रहेका छन् । फिल्म काठमाडौँ उपत्यकामा काफिया फिल्मस् र मोफसलमा कुवेर सिने डिष्ट्रीव्युसनले वितरण गर्दैछन् ।