सुविच्छा कटेज र बेली युवा क्लब भजहर कपको फाइनलमा

धनगढी । कैलालीको कैलारी गाउँपालिका वडा नम्बर ८ लोहरपुरमा भईरहेको तेस्रो भजहर कप फुटबल प्रतियोगितामा सुविच्छा कटेज र बेली युवा क्लब फाईनलमा प्रवेश गरेका छन्।

थारुहरुको पर्व भजहरको अवसरमा हरेक बर्ष हुदैं आएको भजहर कपको तेस्रो संस्करण अन्तर्गत सेमिफाईनलमा जित हात पार्दै सुविच्छा केटज र बेली युवा क्लब फाईनलमा प्रवेश गरेका हुन्।

पहिलो सेमिफाईनल खेलमा सुविच्छा कटेज सेठकलियालेआयोजक श्री जनहित युवा क्लबलाई २–१ ले किनारा लगायो। खेलमा सुविच्छाका एवन चौधरी म्यान अफ द म्याच भए। उनले नगद एक हजार पुरस्कार पाए । दोस्रो सेमिफाईनल खेलमा बेली युवा क्लबले विहारी युवा क्लब बिजुलियालाई १–० ले पराजित गर्दै फाईनलमा स्थान सुरक्षित गरेको छ । खेलको म्यान अफ द म्याच बेलीका प्रवेश चौधरी भए । उनले नगद एक हजार पुरस्कार पाए।

श्री युवा जनहित क्लबको आयोजनामा भईरहेको प्रतियोगिताबैशाख २३ सुविच्छा कटेज र बेली युवा क्लब प्रतिस्पर्धा गर्नेछन। पहिचानमा आधारित खेलकुद विकासमा हाम्रो रहर, थारु कला संस्कृति संरक्षणका लागि भजहर भन्ने नाराका साथ भईरहेको प्रतियोगिताको विजेताले नगद एक लाख तथा उपविजेताले नगद ५० हजार सहित ट्रफी प्राप्त गर्नेछ। प्रत्येक खेलको म्यान अफ द म्याचले नगद एक हजार पाउँदा विभिन्न विधाका उत्कृष्ट खेलाडीलाई पनि पुरस्कार वितरण गरिने आयोजक श्री जनहित युवा क्लबका अध्यक्ष मणिराम चौधरीले जानकारी दिए।

थारु समुदायको पर्व भजहरलाई नयाँ पुस्तामा संरक्षण गर्दै अगाडी बढाउनका लागि गरिदै आएको प्रतियोगितामा फुटबल प्रतियोगिताका साथै पौराणिक खेलहरुको पनि आयोजना गरिएको छ। त्यसका साथै थारु कला संस्कृतिहरु पनि प्रस्तुत गरिरहेको आयोजकले जनाएको छ।