मुख्यमन्त्रीको ‘कि बजेट पास गर्नुस्, कि सरकार छाड्नुस्’ चेतावनीपछि एमाले पंक्तिमा आक्रोश, नयाँ समीकरणको माग

धनगढी -सुदूरपश्चिम प्रदेश सरकारमा सहभागी नेकपा (एमाले) का मन्त्रीहरूलाई तत्काल फिर्ता बोलाउनुपर्ने माग गर्दै पार्टीका नेता तथा कार्यकर्ताहरूले सामाजिक सञ्जालमार्फत नेतृत्वमाथि तीव्र दबाब बढाएका छन्। मुख्यमन्त्रीले ‘कि बजेट पास गर्नुस्, कि सरकार छाडेर जानुस्’ भनी दिएको कडा चेतावनीपछि कार्यकर्ता पंक्तिमा देखिएको असन्तुष्टि थप चुलिएको हो।

मुख्यमन्त्रीको उक्त अभिव्यक्तिले प्रदेशको सत्ता समीकरणलाई पेचिलो बनाएको छ। बजेट पारित गर्ने विषयमा मुख्यमन्त्रीले दिएको अल्टिमेटमपछि एमालेका कार्यकर्ताहरूले फेसबुक, एक्स (ट्विटर) लगायतका सञ्जालमा पार्टी नेतृत्वको कडा आलोचना गरिरहेका छन्। कार्यकर्ताहरूले बजेटको नाममा पार्टीको स्वाभिमानमाथि सम्झौता गर्न नहुने भन्दै मन्त्रीहरूलाई तत्काल सरकारबाट बाहिरिन सामाजिक सञ्जालबाटै दबाब दिइरहेका छन्।

कार्यकर्ताहरूले केवल मन्त्री फिर्ताको माग मात्र गरेका छैनन्, बरु सत्ता समीकरण नै फेरेर अघि बढ्न नेतृत्वलाई सुझावसमेत दिएका छन्। “बजेटको बार्गेनिङ सहेर बस्नुभन्दा एमाले र नेकपा (माओवादी केन्द्र) मिलेर नयाँ सरकार गठन गर्नु नै अहिलेको उत्तम विकल्प हो,” एक स्थानीय नेताले सामाजिक सञ्जालमा लेखेका छन्, “कार्यकर्ताको भावना बुझेर अब तत्काल नयाँ राजनीतिक कोर्समा अघि बढ्नुपर्छ।”

सामाजिक सञ्जालमा सक्रिय धेरैजसो कार्यकर्ताको तर्क छ कि, मुख्यमन्त्रीले नै सरकार छाड्न संकेत गरिसकेको अवस्थामा मन्त्रीहरूले कुनै पनि बहानामा कुर्सीमा टाँसिनु लज्जास्पद छ। पार्टीको नीतिविपरीत सत्ताको लोभमा पर्दा संगठन कमजोर भएको भन्दै उनीहरूले तत्काल एमाले र माओवादी केन्द्रको सहकार्यमा नयाँ सरकार निर्माणका लागि पहल गर्न नेतृत्वलाई घचघच्याइरहेका छन्।

मुख्यमन्त्रीको ‘चेतावनी’ र सामाजिक सञ्जालमा बढेको ‘नयाँ समीकरण’ को यो दबाबले प्रदेशको राजनीतिलाई नयाँ मोडमा उभ्याएको छ। एमालेको प्रदेश नेतृत्वले कार्यकर्ताको यो तीव्र दबाब र नयाँ सरकार गठनको सुझावलाई कसरी सम्बोधन गर्ला, त्यो भने हेर्न बाँकी नै छ।