पल शाहको जन्म दिन पारेर ‘आबाट आमा’को सिक्वेल घोषणा, दशैँमा प्रदर्शन

काठमाडौं – नायक पल शाहको जन्म दिन पारेर आइतबार फिल्म ‘आबाट आमा’को सिक्वेल ‘आबाट आमा २’ निर्माणको घोषणा गरिएको छ ।

निर्देशक चन्द्र पन्तका अनुसार सिक्वेल ०८३ सालको दशैँमा प्रदर्शनमा आउनेछ । उनले मिति भने किटान गरेका छैनन् ।

पारिवारिक कथामा बनेको प्रदर्शनरत फिल्म ‘आबाट आमा’मा नायक पल शाह, नायिकाहरु उषा उप्रेती र सिम्रन पन्त शीर्ष भूमिकामा छ ।

‘सिक्वेल’ निर्माण घोषणा गर्न सार्वजनिक गरिएको पोस्टरमा पललाई एकल फिचर्ड गरिएको छ । पोस्टरमा ‘आउँछु भन्ने झुटो आशामा आमाले बर्सेनि जमरा छरिरहन्छिन्’ भन्ने लाइन राखिएको छ ।

उक्त लाइनले फिल्म दशैंसँग सम्बन्धित कथामा बन्ने संकेत गर्छ । पोस्टरमा पनि ‘दशैँको जमरा र आमाको पर्खाइको कथा’ लेखिएको छ ।

सिक्वेलमा नायिकाहरु दोहोरिन्छ वा दोहोरिदैनन् भन्ने निर्माण पक्षले खुलाएको छैन ।

‘आबाट आमा’ले अहिलेसम्म घरेलु बजारमा १० करोडभन्दा बढी ग्रस कलेक्सन गरेको छ । यो पल शाहको करिअरकै सबैभन्दा हिट फिल्म हो ।

यस हिट फिल्मको लेखक र निर्देशक पन्त आफैँ हुन् ।