मासुका लागि मरिहत्ते, जिउँदै गोरुको फिला काटियो

काठमाडौं : मासुको लागि मान्छेहरु कतिसम्म मरिहत्ते गर्छन् ? कुन हदसम्म अपराध गर्न तयार हुन्छन् ? कल्पना गर्न नसकिने इलामको एउटा घटनाले देखाउँछ ।

घटना इलामको सूर्योदय नगरपालिका ६ कन्यामको हो । त्यहाँ गोठमा बाँधिएको एउटा गोरुको फिला काटेर लगिएको छ । उक्त गोरुको एकापाटा फिलाको भाग नै छैन । हड्डीसम्म खुर्किएर मासु निकालिएको छ । करिब चार किलो मासु निकालेर लगेको स्थानिय संचारकर्मी गोपाल गिरीले बताए ।

‘एकदमै क्रुरतापूर्वक जिउँदै गोरूको फिला काटिएको छ’ उनले भने, ‘हेर्न पनि नसकिने यस्तो काम कसले गर्‍यो पत्ता लगाउन सकिएको छैन ।’ उक्त गोरु स्थानिय राम राईले पालेका थिए ।

सो गोरुको यसअघि पनि फिला काटेर लगिएको थियो । घरेलु उपचारपछि निको हुँदै गएको थियो । लामो समयपछि गोरु बिस्तारै तंग्रिदै थियो । तर, फेरि उसैगरी गोरुको फिलाको मासु काटेर लगेको गिरीले बताए । गोरु धनी राई बिहान गोठमा जाँदा गोरु मरिसकेको थियो ।

यसअघि उनै राईको एक हल गोरुको फिला काटेर लगेको थियो । त्यसमध्ये एउटा गोरु मरिसकेको छ ।

आफ्नो गोठमा बाँधिएको गोरुको फिला काट्ने क्रम नरोकिएपछि राईले स्थानीय जनप्रतिनिधि, प्रहरीलाई बोलाएर कारबाहीको लागि अनुरोध गरेका थिए । तर, उनीहरुले यसको संकेत पाउन नसकिएको भन्दै घटनालाई सामसुम बनाएका थिए ।