सेती प्रादेशिक अस्पतालको हरिबिजोगः उपचार गर्न पुगेकाहरु उल्टै पर्छन् बिरामी !

धनगढी । सुदूरपश्चिम प्रदेशकै रेफरल सेन्टर सेती प्रादेशिक अस्पतालको अवस्था दिनप्रतिदिन बिग्रँदो छ । सुध्रिएला भन्दा अवस्था झन् झन् बिग्रिँदै गएपछि नगारिकहरु तनावमा छन् । 

बहिरबाट हेर्दा अस्पतालमा बनेका भौतिक संरचना निकै आधुनिक र गुणस्तरीय देखिन्छन् । तर भित्रको अवस्था भने दयनीय छ । 

अस्पतालमा बिरामीका लागि प्रयोग हुने ह्वीलचियको संख्या निकै कम छ । तर भएका ह्वीलचियरहरु पनि बिग्रिएका छन् । अस्पतालमा भएका ह्वीलचियरहरु बिग्रिएपछि बिरामीलाई हिँडडुल गर्न, शौचालय जान पनि निकै ठूलो सास्ती खेप्नुपरेको बिरामीहरुले गुनासो गरेका छन् । 

अर्कोतर्फ दैनिक सयौँ नागरिक उपचारका लागि पुग्ने सेती प्रादेशिक अस्पतालमा कुनै शौचालयमा ढोका नै छैनन् भने कुनै शौचालयका ढोकामा चुक्कुल नै छैनन् । फोहोरको समस्या उस्तै छ । 

फोहोर अत्याधिक हुँदा अस्पताल परिसरमा लामखुट्टे बढेको बिरामीहरु बताउँछन् । फोहोर हेरिनसक्नु छ । ‘फोहोरकै कारण लामखुट्टे बढेका छन् । आरामले अस्पतालमा बस्नै सकिने स्थिति छैन ।’ एक बिरामीले भने, ‘अस्पतालमा उपचारका लागि आउने बिरामीहरु अस्पतालको अवस्थाका कारण उल्टै बिरामी हुने अवस्था छ ।’

त्यस्तै अस्पतालमा गर्भवती महिलाको हेरचाह पनि राम्रोसँग नहुने बिरामीहरुले गुनासो गरेका छन् । साथै अस्पतालमा कार्यरत नर्सहरुले पनि बिरामीको राम्रोसँग हेरचाह नगर्ने, बिरामी तथा कुरुवासँग झर्किनेजस्ता गतिविधि गर्ने गरेको अस्पताल पुग्नेहरुले बताएका छन् ।