दुर्गमकै झल्को दिन्छन् धनगढीका यी वडाहरुले…

धनगढी । हुन त धनगढी सुदूरपश्चिम प्रदेशको अस्थायी राजधानी मात्र होइन, देशभरमै सुगम पालिकामध्येको एक पालिका पनि हो ।

तर धनगढीका केही वडाका बासिन्दाहरुले झेलिरहेको सास्ती दुर्गम जिल्लाको भन्दा कम छैन । धनगढी उपमहानगरपालिका वडा नम्बर १९ का बासिन्दा वर्षायाममा डुबान, कटान र हिउँदमा शितलहरबाट सास्ती खेप्न बाध्य छन् ।

लामो समयदेखि सडक सञ्जालबाट टाढा रहेको वडा नम्बर १९ मा सडक विस्तार भए पनि नागरिकका आधारभूत आवश्यकता भने ज्युँका त्युँ छन् । यहाँका नागरिकहरुले खानेपानी, गुणस्तरीय शिक्षा र स्वास्थ्य सेवाबाट बञ्चित हुनुपरेको गुनासो गरेका छन् । त्यति मात्र होइन स्थानीय तहबाट आउने सेवा तथा सुविधामा पनि प्रयाप्त पहुँच नभएको उनीहरुले गुनसाो गरेका छन् ।

यस्तै १९ नम्बर वडाजस्तै वडा नम्बर १२ का नागरिक पनि ठूलै अभाव झेल्न बाध्य छन् । वडा नम्बर १२ स्थित शिविर बस्तीमा अझै पनि खानेपानीको पहुँच छैन । नलबाट आउने पानी पनि जेठ बैशाख सुक्ने समस्याले नागरिक मर्कामा पर्ने गरेका छन् । अन्य समयमा जसोतसो पानीको व्यवस्थापन गरे पनि नल नै सुक्दा ठूलै समस्या हुने गरेको स्थानीय सितादेवी चौधरीले बताएकी छिन् । खानेपानीको सुविधा छैन, ढल निकासमा पनि समस्या छ, उनले भनिन्, अझ शिक्षा र स्वास्थ्यजस्ता आधारभूत आवश्यकता पनि प्रयाप्त मात्रामा छैनन् ।

त्यस्तै वडा नम्बर ९ मा पनि सडक निर्माण भए पनि व्यवस्थित रुपमा निर्माण नभएको स्थानीयहरुको भनाई छ । स्थानीयका अनुसार सडक क्षेत्रमा फुटपाथ प्रयाप्त छैनन्, भए पनि व्यवस्थित छैनन् । अर्कोतर्फ नाला र ढल निकासको व्यवस्था नगरिँदा बर्खायाममा नागरिकले ठूलै सास्ती भोग्नुपरेको स्थानीय सुवोध कुमार रानाले बताएका छन् । उनले सडक क्षेत्रमा प्रयाप्त बत्ति नहुँदा पनि जोखिम बढेको बताएका छन् ।

साथै उनीहरुले स्थानीय तह र जनप्रतिनिधिलाई स्थानीयसँग तत्काल समन्वय गरेर समस्याको समाधानमा केन्द्रित हुन आग्रह गरेका छन् । यसतर्फ सम्बन्धित पालिका र जनप्रतिनिधिले ध्यान दिन जरुरी छ ।