धनगढीमा छठको रौनक, चिटिक्क पारियो मोहना घाट (फोटो फिचर)

धनगढी : तराई वासीले विशेष रुपमा मनाउने छठ पूजाको तयारी पुरा भएको छ ।

छठको अवसरमा विशेष रौनक छाउने तराई तराई तथा अझ विशेष गरी मधेशका जिल्लाहरूमा मनाउने छठ पर्वको तयारी धनगढी उपमहानगरपालिका वडा नम्बर २ मा रहेको मोहना घाटमा टेण्ट निर्माण, बिजुली बत्ति र रातिका लागि जाग्रमस्थल निर्माण कार्य पुरा भएको समितिका अध्यक्ष सन्तोष मण्डलले बताएका छन् ।

छठलाई मधेशको सबभन्दा ठूलो पर्वको रूपमा पनि लिइन्छ । छठलाई लक्षित नजिकका नदी तलाउ तथा पोखरीहरूलाई चिटिक्क पारी सिँगागार्ने प्रचलन रहि आएको छ । ग्रामीण क्षेत्रमा पनि छठ पर्वको घाट निर्माणका लागि पोखरी, नदीको किनारा तथा जलाशय क्षेत्रमा युवाहरू सरसफाइदेखि घाट निर्माणमा जुटेका छन् ।

मंगलबारदेखि विधिवत् रूपमा सुरु हुने छठ चार दिनसम्म चल्नेछ । पहिलो दिन व्रतालुहरू स्नान गरी शाकाहारी तथा शुद्ध भोजन गर्छन्, जसलाई ‘नेहाइ खाइ’ भन्ने गरिन्छ । यसलाई अरबा– अरबाइन पनि भनिन्छ । खरनाका दिन व्रतालु महिलाहरू दिनभरि व्रत बसी साँझमा सूर्यको पूजा गरी सख्खर मिलाएको गम्हरीको खीर र रोटी आदि खान्छन् ।

त्यसपछि व्रतालुहरूले निराहार व्रत सुरु गर्छन् । बिहीबार अस्ताउँदो सूर्यलाई र शुक्रबार उदाउँदो सूर्यलाई अर्घ दिएपछि उक्त व्रत समाप्त हुन्छ ।