कञ्चनपुरको शुक्लाफाँटा नगरपालिकाले सडक छेउका संरचना हटाउन डोजर चलायो

धनगढी, २६ साउन । कञ्चनपुरको शुक्लाफाँटा नगरपालिकाले सडक छेउछाउका संरचना हटाउन थालेको छ । डोजरसहित सडकमा पुगेका छन् । नगरपालिकाको वडा नं. ११ स्थित कलुवापुर बजारको ढल व्यवस्थापनको लागि संरचना हटाउन थालेको हो ।

हिजो बिहीवार नगर प्रमुख रणबहादुर महरा नेतृत्वको टोली डोजर सहित उक्त क्षेत्रमा पुगे को थियो । नगरपालिकाले दुबैतर्फ सडक क्षेत्रभित्र पर्ने संरचना समेत हटाइरहेको छ । जिल्लाको कलुवापुर बजार क्षेत्रमा डुवान हुन थालेपछि सडकको दुबैतर्फ अस्थायी नाली निर्माण गरिन लागेको नगर प्रमुख महराले बताए ।

जिल्ला प्रशासन कार्यालय कञ्चनपुरमा सरोकारवालाहरुको छलफलमा सडक डिभिजन कार्यालयले सीमांकन गर्ने, पूर्वाधार विकास कार्यालयले नाली निर्माण गर्ने, विद्युत कार्यालयले पोलहरु हटाउने र नगरपालिकाले सडक क्षेत्र खाली गराउने निर्णय गरिएको थियो । सडक र पूर्वाधार विकास कार्यालयले चासो नदेखाएपछि तत्कालको समस्या समाधानका लागि नगरपालिकाले अस्थायी नाली निर्माण गरिरहेको जनाएको छ ।