सर्लाही- जिल्ला प्रशासन कार्यालय सर्लाहीले बरहथवा नगरपालिका क्षेत्रमा कर्फ्यू आदेश जारी गरेको छ ।
जिल्ला प्रशासनले प्राथमिक स्वास्थ्य केन्द्रको स्तरोन्नतीको विषयलाई लिएर भएको विरोध प्रदर्शनका कारण सर्वसाधारणको सुरक्षामा पर्नसक्ने जोखिम र शन्ति भंग हुन जानसक्ने अवस्थालाई लिएर बरहथवा नगर क्षेत्रमा कर्फ्यू आदेश जारी गरिएको जनाएको छ ।
प्रशासनले जारी गरेको आदेशमा शुक्रबार बेलुका ५ बजेर ३० मिनेटदेखि शनिबार बिहान ८ बजेसम्मका लागि उत्तरमा सोती चोर्निया पुल, पश्चिमा हजरिया जाने बाटोको नहर, दक्षिणमा हनुमान मन्दिर र पूर्वमा सीतापुर जाने स्थानलाई चार किल्ला स्थापित गरी करफ्यू आदेश जारी गरिएको जनाइएको छ ।
कर्फ्यू आदेश उल्लङ्घन गर्नेलाई सुरक्षाकर्मीले आवश्यकता अनुसार बल प्रयोग गरी कारवाही गर्नसक्ने सर्लाहीका प्रमुख जिल्ला अधिकारी कोमलप्रसाद धमलाले जारी गरेको कर्फ्यू आदेशमा जनाइएको छ ।
यसअघि शुक्रबार बरहथवा नगर क्षेत्रमा भएको प्रदर्शनका क्रममा प्रहरीले बल प्रयोग गर्दा एक जनाको मृत्यु भएको थियो ।
प्रतिक्रिया दिनुहोस्