बैतडीको झुलाघाट नाका बन्द

बैतडी, ११ असोज । भारतसँग सीमा जोडिएको बैतडीको झुलाघाट नाका बन्द गरिएको छ । महाकाली नदीमाथिको झोलुङ्गे पुल मर्मत गर्नु पर्ने भएपछि अर्को सूचना जारी नभएसम्म नाका बन्द गरिएको बैतडीका प्रमुख जिल्ला अधिकारी सुरेश पन्थीले जानकारी दिए ।

प्रमुख जिल्ला अधिकारी पन्थी का अनुसार पुलको भारतीय सिमानातर्फ बेस (काठ) लक भाँच्चिएपछि भारतीय पक्षले पुल मर्मतको काम गरिरहेकाले सीमा नाकामा आवागमन बन्द गरिएको हो । यसअघि मर्मतकै लागि भनेर सोमवार पनि आवागमन बन्द गरिएको थियो।

तर, मर्मतको काम नसकिएको भन्दै मङ्गलवारदेखि अर्को सूचना जारी नभएसम्मका लागि आवागमन स्थगन गरिएको हो। अर्को सूचना जारी नहुँदासम्मका लागि दैनिक बिहान ८ः४५ देखि दिउँसो १ः१५ बजेसम्म र दिउँसो २ः१५ बजेदेखि पुनः ४ः१५ बजेसम्म पुलमा आवागमन बन्द गरिएको जिल्ला प्रहरी कार्यालय बैतडीले जनाएको छ ।