बैतडीमा वनडढेलो नियन्त्रणका लागि जनचेतना अभियान

बैतडीमा बढ्दो वनडढेलोका घटनाबाट हुने क्षति कम गर्ने उद्देश्यले समुदायस्तरमा सचेतनामूलक कार्यक्रम सञ्चालन गरिएको छ। डिभिजन वन कार्यालय बैतडीले ‘वन डढेलो व्यवस्थापन सप्ताह’ को अवसर पारेर यस्तो अभियान अघि बढाएको हो।

नेपालको भौगोलिक विविधताका कारण यहाँका वनमा बहुमूल्य जडीबुटी पाइन्छन्। तर पछिल्लो समय मानवीय लापरबाहीका कारण वनडढेलो बढ्दै जाँदा यस्ता प्राकृतिक सम्पदामा ठूलो क्षति पुगिरहेको छ। वन विभागका तथ्याङ्कअनुसार देशको करिब ४४.७४ प्रतिशत भूभाग वनले ढाकेको छ भने प्रत्येक वर्ष दुई हजारभन्दा बढी आगलागीका घटना हुने गरेका छन्।

हरेक वर्ष चैत १ देखि ७ गतेसम्म मनाइने ‘वन डढेलो व्यवस्थापन सप्ताह’ अन्तर्गत बैतडीमा पनि विभिन्न कार्यक्रमहरू सञ्चालन गरिएका छन्। डिभिजन वन कार्यालयका सूचना अधिकारी नरेशचन्द्र कर्णका अनुसार समुदायमा जनचेतना फैलाएर आगलागीका घटनालाई उल्लेख्य रूपमा घटाउन सकिन्छ। उनले विद्यालय तहको पाठ्यक्रममै वनडढेलोसम्बन्धी विषय समावेश गर्नुपर्ने आवश्यकता पनि औंल्याए।

सुदूरपश्चिमका पहाडी जिल्लाहरूमा, विशेषगरी सल्लो वनमा, आगलागीका घटना बढी देखिन्छन्। पाटन नगरपालिका–६ का वडाध्यक्ष राजेन्द्र बिष्टका अनुसार खर–फाग्लो जलाउने तथा घाँस चाँडो पलाउने गलत सोचका कारण यस्ता घटना बढ्ने गरेका छन्।

डिभिजन वन कार्यालयले सप्ताहभर समुदायलाई आगलागी नियन्त्रणसम्बन्धी अभ्याससमेत गराउँदै आएको जनाएको छ। सुक्खायाम सुरु भएसँगै फागुनदेखि जेठसम्म वन क्षेत्रमा डढेलोको जोखिम उच्च हुने भएकाले समयमै तयारी, समन्वय र जनचेतना अभिवृद्धि अत्यन्त आवश्यक रहेको विज्ञहरूको भनाइ छ।