बैतडीमा यस वर्ष एसईई दिने विद्यार्थी संख्या घटेको देखिएको छ। गत वर्ष ४,३०७ जना सहभागी भएकोमा यस पटक ३,९२१ जना मात्रै परीक्षामा सहभागी हुनेछन्, अर्थात् ३८६ जनाले कमी आएको हो।
यद्यपि, परीक्षा दिने विद्यालयको संख्या भने बढेको छ। यस वर्ष १३८ सामुदायिक र ४ संस्थागत गरी १४२ विद्यालयका विद्यार्थी एसईईमा सहभागी हुँदैछन्, जुन गत वर्षको तुलनामा ६ विद्यालय बढी हो।
ग्रेडवृद्धि परीक्षामा पनि सहभागिता घटेको छ। गत वर्ष १,०५५ जना सहभागी भएकोमा यस वर्ष ६३० जना मात्र सहभागी हुने भएका छन्।
आगामी चैत १९ देखि २९ गतेसम्म सञ्चालन हुने परीक्षाका लागि जिल्लामा २६ वटा परीक्षा केन्द्र तोकिएका छन्। प्राविधिक धारतर्फका विद्यार्थीका लागि पाटनस्थित भीमदत्त बहुप्राविधिक शिक्षालयमा केन्द्र निर्धारण गरिएको छ।
शिक्षा समन्वय इकाइका अनुसार बसाइँसराइको वृद्धि र सामुदायिक विद्यालयप्रति अभिभावकको घट्दो विश्वासका कारण विद्यार्थी संख्या हरेक वर्ष घट्दै गएको देखिन्छ।
प्रतिक्रिया दिनुहोस्