बर्दघाट नगरमा सामुदायिक विद्यालयमा पढ्ने विद्यार्थीलाई दुर्घटना राहत कोष

परासी — पश्चिम नवलपरासीको बर्दघाट नगरपालिकाले विद्यालय तहका विद्यार्थीहरुका लागि दुर्घटना राहत कोष स्थापना गरेको छ । नगरमा संचालित सामुदायिक विद्यालयमा अध्ययनरत विद्यार्थीलाई मध्यनजर गर्दै विद्यार्थी राहत कोष स्थापना गरिएको हो । 

विद्यालय समयमा कुनै पनि विद्यार्थीलाई चोटपटक लागेमा, दुर्घटनामा परेमा नगरले नि:शुल्क उपचार गरिदिने छ । विद्यालयको सिफारिसको आधारमा बढीमा एक लाखसम्मको उपचार र सहयोग उपलब्ध गराउने व्यवस्था गरिएको बर्दघाट नगरपालिकाका नगरप्रमुख शम्भुलाल श्रेष्ठले बताए ।

साथै नगर भित्रका अति विपन्न, ज्येष्ठ नागरिकलाई नगरभित्र रहेका दुईवटा अस्पतालमा स्वास्थ परीक्षण र प्रयोगशाला परीक्षण पनि नि:शुल्क गरेको छ ।

आर्थिक वर्ष २०८२/८३ को बजेटमा विद्यार्थी राहत कोषका लागि १० लाख र विपन्न उपचार कोषका लागि १५ लाख रुपैयाँ बजेट विनियोजन गरेको नगरपालिकाले जनाएको छ ।