नेपाली महिला फुटबल टिमको नजर अब एसियन कप छनोटमा

काठमाडौं : नेपाली महिला फुटबल टिमले पटकपटक अन्तर्राष्ट्रिय प्रतियोगिताको फाइनलमा स्थान बनाएको रेकर्ड छ ।

टोलीले १५ वर्षको अवधिमा १३ पटक महत्वपूर्ण प्रतियोगिताको फाइनलमा स्थान बनाएको हो । तर, नेपाली महिला टिमले ट्रफी चुम्ने मौका भने पाउन सकेको छैन । त्यो नियति यसपालि पनि दोहोरियो ।

घरेलु मैदानमा प्रतियोगिता आयोजना भएकाले नेपालले यसपटक चाहिँ उपाधि खडेरी तोड्ने अनुमान थियो । तर, नेपालको उपाधि सपनामा म्यानमार बाधक बन्यो । बुधबार बेलुका सम्पन्न अन्तर्राष्ट्रिय महिला च्याम्पियनसिपको फाइनलमा म्यानमारसँग २–० ले पराजित भएपछि फेरि नेपालको उपाधि सपनामा धक्का लागेको हो । 

त्रिपुरेश्वरस्थित दशरथ रंगशालामा भएको फाइनल भिडन्तमा पहिलो हाफसम्म नेपालले म्यानमारलाई गोलरहित बराबरी रोकेको थियो । तर, दोस्रो हाफमा दुई मिनेटको अन्तरमा दुई गोलको सामना गरेपछि नेपाललाई पुनरागमन गर्न कठिन भयो ।

खेलमा नेपालले गोल गर्ने अवसर प्राप्त नगरेको भने होइन । खेलाडी फिनिसिङमा चुक्दा नेपाली टिम गोल चुक्यो । मुख्य प्रशिक्षक राजेन्द्र तामाङ पनि पाएको अवसरलाई सदुपयोग गर्न नसक्दा नेपाल पराजित भएको बताउँछन् । 

महिला च्याम्पियनसिपमा सर्वोत्कृष्ट खेलाडी घोषित भएकी मिडफिल्डर रेनुका नगरकोटे एक्सपोजर कम पाउँदा नेपाल फाइनलमा चुकिरहेको बताउँछिन् । र, यसपालि पनि सोही कारण नेपाल उपाधि जित्न वञ्चित भएको उनको भनाइ छ । 

नेपालले गत अक्टोबरमा मात्र साफ च्याम्पियनसिपको फाइनलमा दशरथ रंगशालामै बंगलादेशसँग पराजय बेहोरेको थियो । हालसम्म नेपालले फाइनल हारेको प्रतियोगिताको सूची नियाल्दा शीर्ष स्थानमा साफ च्याम्पियनसिप आउँछ ।

अहिलेसम्म नेपाली महिला टोली साफ फाइनलमा ६ पटक उपविजेता बनेको छ । यस्तै, नेपालले दक्षिण एसियाली खेलकुद (साग) फाइनलमा तीनपटक पराजय बेहोरेको छ ।

त्यस्तै, नेपाली टिम हिरो गोल्डकप, नादेज्दा कप, वाफ वुमन्स च्याम्पियनसिप र इन्टरनेशनल वुमन्स च्याम्पियनसिप फाइनलमा एक/एकपटक स्तब्ध भएको छ । उपाधि भिडन्तमा नेपाललाई सर्वाधिक सताइरहने टिममा पर्छ, भारत ।

भारतसँग नेपाल सातपटक पराजित भएको छ । यस्तै, नेपालले फाइनलमा बंगलादेश र म्यानमारसँग दुई/दुईपटक तथा उज्वेकिस्तान र जोर्डनसँग एक/एकपटक पराजय बेहोरेको इतिहास छ । 

अन्तर्राष्ट्रिय च्याम्पियनसिपपछि नेपालको ध्यान अब एएफसी एसियन कप २०२६ को छनोटमा हुनेछ । त्योभन्दा अगाडि नेपालले अप्रिलमा मैत्रीपूर्ण प्रतियोगिता खेल्नेछ ।

मुख्यप्रशिक्षक राजेन्द्र तामाङका अनुसार एसियन कप छनोटको तयारीस्वरूप नेपाली महिला टिमले मैत्रीपूर्ण म्याच खेल्ने भएको हो । यद्यपि त्यो प्रतियोगिताको विस्तृत तालिका सार्वजनिक हुन बाँकी छ ।

उक्त प्रतियोगितापछि नेपालले आउँदो २३ जुनदेखि ५ जुलाईसम्म एसियन कप छनोट खेल्नेछ । एएफसीका अनुसार छनोटका खेल अन्तर्राष्ट्रिय विन्डोमा हुनेछन् ।