लेखकले रिहाइ भएपछि लेखे– कानुनी र राजनीतिक लडाईं जारी छ

काठमाडौँ । नेपाली कांग्रेसका नेता तथा पूर्वगृहमन्त्री रमेश लेखकले कानुनी र राजनीतिक लडाईं जारी रहेको बताएका छन् ।  उनले गौरीबहादुर कार्की नेतृत्वको छानबिन आयोगको प्रतिवेदन पूर्वाग्रही, प्रतिशोधपूर्ण, अपूर्ण रहेको उल्लेख गरेका छन् । 

लेखकले फेसबुकमा लेखेका छन्, ‘गत भाद्र २३ र २४गतेको घटनाका सन्दर्भमा गठित आयोगको पूर्वाग्रही, प्रतिशोधपूर्ण, अपूर्ण र अप्रमाणित प्रतिवेदनको आधारमा  फौजदारी अभियोग लगाई १३ दिनसम्म नियन्त्रणमा राखे पनि अन्ततः म रिहा भएको छु।’

उनले आफू कानुन पालना गर्ने र न्यायमा विश्वास गर्ने व्यक्ति भएकाले राजनीतिक र कानुनी लडाईं जारी राख्ने उल्लेख गरेका छन् । ‘परमादेश जारी गर्ने सम्मानित सर्वोच्च अदालतप्रति उच्च सम्मान व्यक्त गर्दछु। म क़ानून पालना गर्ने र न्यायमा विश्वास गर्दछु। बाँकी कानुनी र राजनीतिक लडाईं जारी रहनेछ,’ लेखकले लेखेका छन् । आफ्नो रिहाइका लागि आवाज उठाउने सबैमा लेखकले आभार व्यक्त गरेका छन् । 

गत भदौ २३ र २४ गते भएको जेनजी आन्दोलन दबाएको भन्दै लेखकलाई प्रहरीले चैत १४ गते पक्राउ गरेको थियो । उनी सर्वोच्चको परमादेशपछि बिहीबार रिहा भएका थिए ।