दीक्षित सैन्य अधिकृतहरूलाई प्रधानमन्त्री भने, ‘आफ्नो कर्तव्य र जिम्मेवारीप्रति सदैव सजग रहनुहोला’

काठमाडौँ । भक्तपुरको खरिपाटीस्थित नेपाली सैनिक प्रतिष्ठानमा बिहीबार एक भव्य समारोहका बिच अधिकृत क्याडेट तालिमको आयुक्त पद प्रदान कवाज सम्पन्न भएको छ ।

प्रधानमन्त्री वालेन्द्र शाहको प्रमुख आतिथ्यमा आयोजित उक्त विशेष समारोहमा विभिन्न तालिम समूहका कुल १८३ जना अधिकृत क्याडेटहरूले सफलतापूर्वक तालिम सम्पन्न गरी आयुक्त पद प्राप्त गरेका हुन् ।

समारोहलाई सम्बोधन गर्दै प्रधानमन्त्री शाहले कठिन सैन्य तालिम पूरा गरी राष्ट्रको सुरक्षाको जिम्मेवारी काँधमा लिएका नवआयुक्त अधिकृतहरूलाई बधाई ज्ञापन गरे। उनले मातृभूमि र जनताको रक्षाका लागि समर्पित हुने दृढ सङ्कल्पका साथ सेनामा प्रवेश गरेका अधिकृतहरूले सैन्य आचरण, अनुशासन र चेन अफ कमान्डलाई आत्मसाथ गर्दै आफ्नो कर्तव्य र जिम्मेवारीप्रति सदैव सजग रहने विश्वास व्यक्त गरे । सोही अवसरमा प्रधानमन्त्रीले तालिममा उत्कृष्ट प्रदर्शन गर्ने अधिकृत क्याडेटहरूलाई श्रेष्ठताको प्रतीक स्वरूप खुकुरी तथा छडी प्रदान गरी पुरस्कृत गरे ।

दीक्षित हुनेहरूमा सि.सं. ६३ अधिकृत क्याडेट, सि.सं. ५ स्नातक अधिकृत क्याडेट र सि.सं. ५३ पदिक तथा बिल्लादार अधिकृत आधार तालिममा सहभागी शिक्षार्थीहरू रहेका छन्। कार्यक्रममा प्रधान सेनापति महारथी अशोक राज सिग्देलले मित्रराष्ट्र केन्या र जाम्बियाबाट तालिममा सहभागी भएका ३ जना विदेशी शिक्षार्थी अधिकृत क्याडेटहरूलाई नेपाली सैनिक प्रतिष्ठानको विशेष पदक प्रदान गरे । सन् २०१२ देखि विदेशी शिक्षार्थीलाई समेत तालिम दिन थालिएकोमा हालसम्म विभिन्न राष्ट्रका ३२ जनाले यहाँबाट सैन्य तालिम पूरा गरिसकेका छन् ।

नेपाली सैनिक प्रतिष्ठानले आफ्नो स्थापनाकालदेखि हालसम्म ६ हजार ७३४ जना अधिकृत क्याडेट र पदिक तथा बिल्लादार अधिकृत क्याडेटका साथै १ हजार ६०८ जना प्राविधिक अधिकृतहरूलाई सफलतापूर्वक तालिम दिइसकेको छ। कवाज प्रदर्शनपछि नवआयुक्त अधिकृतहरूलाई उनीहरूका अभिभावक तथा आफन्तजनले दर्ज्यानी चिन्हद्वारा सुशोभन गराएका थिए ।