विश्वकपमा छनोट हुन नसकेपछि इटाली फुटबल संघका प्रमुखको राजीनामा

२० चैत, काठमाडौं । इटाली लगातार तेस्रोपटक विश्वकपमा छनोट हुन असफल भएपछि इटालियन फुटबल महासंघका अध्यक्ष गाब्रिएले ग्राभिनाले पदबाट राजीनामा दिएका छन् ।

चार पटकको विश्वकप विजेता इटाली निर्णायक खेलअन्तर्गत प्लेअफ फाइनलमा बोस्निया–हर्जेगोभिनासँग पेनाल्टीमा ४–१ ले पराजित भएपछि छनोट हुन असफल भएको थियो ।

यसअघि इटालीले सन् २०१८ को रसिया र २०२२ को कतार विश्वकप पनि गुमाएको थियो । इतिहासमा पहिलो पटक कुनै पनि पूर्व विश्वकप विजेता टोली लगातार तीन पटक विश्वकपमा छनोट हुन असफल भएको हो ।

यसैबीच राष्ट्रिय टोलीसँग नजिकबाट काम गरिरहेका पूर्व गोलकिपर जियानलुइजी बुफोनले पनि प्रतिनिधि प्रमुख पदबाट राजीनामा दिएका छन् । सन् २००६ को विश्वकप विजेता टोलीका सदस्य बुफोनले मुख्य लक्ष्य इटालीलाई पुनः विश्वकपमा फर्काउनु भए पनि त्यो पूरा गर्न नसकेको भन्दै नैतिक जिम्मेवारीका आधारमा पद छाडेको बताएका छन् ।

७२ वर्षीय ग्राभिनाले सन् २०१८ अक्टोबरमा अध्यक्ष पद सम्हालेका थिए। उनको कार्यकालमा इटालीले युरो २०२० को उपाधि जितेको थियो, जहाँ फाइनलमा इंग्ल्याण्डलाई पेनाल्टीमा पराजित गरेको थियो ।

तर पछिल्ला असफलतापछि उनीमाथि चर्को आलोचना भइरहेको थियो । उनले प्रशिक्षकका रूपमा लुचियानो स्पालेट्टी र हालका प्रशिक्षक जेन्नारो गाट्टुसोलाई नियुक्त गरेका थिए । राजीनामाअघि उनले गाट्टुसोलाई पदमै रहन आग्रह गरेका थिए ।

फुटबल महासंघले नयाँ अध्यक्ष चयनका लागि जुन २२ मा निर्वाचन गर्ने जनाएको छ । नयाँ नेतृत्वका लागि इटालियन ओलम्पिक कमिटीका पूर्व प्रमुख जियोभान्नी मालागो प्रमुख दाबेदार मानिएका छन् ।

यससँगै अर्को चिन्ताको विषयका रूपमा सन् २०३२ को युरोपियन च्याम्पियनसिप पनि देखिएको छ । इटालीले टर्कीसँग संयुक्त रूपमा आयोजना गर्ने योजना भए पनि आवश्यक पूर्वाधार अभावका कारण जोखिममा परेको छ । युईएफएका अध्यक्ष अलेक्जान्डर चेफेरिनले आवश्यक सुधार नगरे प्रतियोगिता इटालीमा नहुन सक्ने चेतावनी दिएका छन्।

इटालीले अक्टोबरभित्र पाँचवटा स्टेडियमको नाम युएफालाई बुझाउनुपर्नेछ। तर पुराना स्टेडियम, निर्माण ढिलाइ र सरकारी विवादका कारण धेरै क्लबहरूले पूर्वाधार सुधार गर्न सकेका छैनन्।

चेफेरिनले यसका लागि खेल प्रशासनभन्दा बढी इटालीका राजनीतिक नेतृत्व जिम्मेवार हुन सक्ने टिप्पणी गरेका छन्।