धनगढी । धनगढीमा अहिले सीप तथा रोजगार मेला चलिरहेको छ । युवा तथा सीप सकेर आत्मनिर्भर बन्न चाहनेहरुलाई लक्षित गर्दै सीप मेलाको आयोजना गरिएको हो ।
धनगढी उपमहानगरपालिकाद्वारा आयोजना गरिएको त्यही सीप तथा रोजगार मेला अहिले धेरै महिलाका लागि अवसर मात्रै होइन, आत्मविश्वासको ढोका बनेको छ । हिजोसम्म घरधन्दामै सीमित भएका महिलाहरु अहिले नयाँ–नयाँ सीप सिकेर कमाइ गर्ने तयारीमा छन् ।
मेलामा सिलाइ–कटाइ, ब्यूटी पार्लर, कम्प्युटर, खाना पकाउने, हस्तकला जस्ता तालिम चलिरहेका छन् ।
बिहानैदेखि तालिम केन्द्रमा महिलाको चहलपहल देखिन्छ । “अब आफ्नै हातले कमाउन सकिन्छ भन्ने हिम्मत आएको छ ।” एक सहभागीले खुसी हुँदै भनिन् ।
कतिपयले त तालिम सकिनासाथ सानो व्यवसाय सुरु गर्ने सोच बनाइसकेका छन् । कसैले घरमै सिलाइ पसल खोल्ने योजना बनाएका छन् भने कसैले ब्यूटी पार्लर चलाउने तयारी गरेका छन् ।
तालिमसँगै कसरी व्यवसाय सुरु गर्ने भन्ने जानकारी पनि दिइँदा झन् उत्साह बढेको सहभागीहरू बताउँछन् ।
यो मेला महिलालाई सीप सिकाएर आत्मनिर्भर बनाउने उद्देश्यले आयोजना गरिएको हो । अहिले देखिएको जोश–जाँगर हेर्दा, धनगढीका धेरै महिला अब अरूको भर पर्नु भन्दा आफ्नै खुट्टामा उभिने बाटो रोज्दैछन् ।
प्रतिक्रिया दिनुहोस्