बीमा भुक्तानीको समस्या समाधान गर्न लचकता अपनाएका छाैँ : अर्थमन्त्री

काठमाडौँ । अर्थमन्त्री रामेश्वर खनालले स्वास्थ्य मन्त्रालयले बजेट तर्जुमा गर्दा प्राथमिकता निर्धारण गर्न नसक्दा स्वास्थ्य बीमाको भुक्तानीमा समस्या देखिएको बताएका छन् । 

चालु आर्थिक वर्ष २०८२/८३ को बजेटको अर्धवार्षिक समीक्षा सार्वजनिक गर्दै मंगलबार अर्थमन्त्री खनालले स्वास्थ्य मन्त्रालयले पाएको बजेट सिलिङबाटै बीमाको दायित्व व्यवस्थापन गर्नुपर्दा अहिलेको सङ्कट आएको बताएका हुन् ।

अर्थमन्त्री खनालले भने, ‘स्वास्थ्य मन्त्रालयलाई बजेट बनाउने बेलामै पाएको सिलिङबाट स्वास्थ्य बीमाको सबै भुक्तानी गर्न पुग्ने गरी राख्नुस् भनिएको थियो । तर, उहाँहरूले कम राखेर पाएको बजेट अरूतिरै प्रयोग गर्नुभयो। अर्थ मन्त्रालयले चाहेर पनि स्वास्थ्य बीमामा कति दायित्व आउँछ भन्ने थाहा पाउन सक्दैन ।’

बीमा भुक्तानीको समस्या समाधान गर्न अर्थ मन्त्रालयले लचकता अपनाएको मन्त्री खनालले जानकारी दिए । उनका अनुसार सुरुमा १ अर्ब रुपैयाँ दिइएको र हालसालै स्वास्थ्य मन्त्रालयकै अन्य शीर्षकमा बचत हुने देखिएको १ अर्ब ७२ करोड रुपैयाँ रकमान्तर गरी बीमा भुक्तानीका लागि बाटो खोलिदिएको छ ।

‘सरकारी अस्पतालहरू बन्द नै हुने अवस्था आउन नदिन हामी गम्भीर छौँ,’ मन्त्री खनालले भने, ‘फागुन २१ गतेपछि स्रोतको उपलब्धता हेरेर थप दायित्व भुक्तानी गर्दै जानेछौँ।’