सुरक्षा बलको कारबाहीमा दुई सय १६ आतंककारी मारिएको दाबी

काठमाडौँ । पाकिस्तानको दक्षिण-पश्चिमी प्रान्त बलुचिस्तानमा सुरक्षा बलले आतंकवाद विरोधी अभियान सम्पन्न गरेको र यस क्रममा कम्तीमा दुई सय १६ आतंककारी मारिएको सेनाले जनाएको छ ।

आतंककारीहरूले गरेका आक्रमणमा सुरक्षा बल र कानून कार्यान्वयन गर्ने निकायका २२ जना कर्मचारी र ३६ जना सर्वसाधारणको पनि मृत्यु भएको पाकिस्तानी सेनाको सञ्चार शाखा इन्टर-सर्भिसेज पब्लिक रिलेसन्स (आईएसपीआर) ले एक विज्ञप्तिमार्फत जानकारी दिएको छ ।

स्थानीय बासिन्दाका लागि गम्भीर खतरा उत्पन्न गर्ने आतंककारीहरूको उपस्थितिको बारेमा विश्वसनीय र प्रमाणित गुप्तचरी सूचना प्राप्त भएपछि जनवरी २९ मा यो अभियान शुरू गरिएको थियो ।

त्यसपछि, सुरक्षा बलले प्रतिबन्धित बलुचिस्तान लिबरेसन आर्मीद्वारा गरिएका श्रृंखलावद्ध आक्रमणहरूलाई विफल पारेको आईएसपीआरले जनाएको छ ।

विज्ञप्तिका अनुसार, यसपछि विभिन्न क्षेत्रहरूमा गुप्तचरीमा आधारित अपरेसनहरूको विस्तारित अभियान चलाइएको थियो, जसको उद्देश्य निरन्तर कोम्बिङ र सेनिटाइजेसन प्रयासहरूमार्फत आतंककारीका ’स्लिपर सेल’हरूलाई ध्वस्त पार्नु थियो ।

अभियानका क्रममा ठूलो परिमाणमा विदेशी हतियार, गोलाबारुद, विस्फोटक पदार्थ र अन्य उपकरणहरू पनि बरामद गरिएको विज्ञप्तिमा उल्लेख छ ।