काठमाडौं– नेपाल सरकार स्वास्थ्य तथा जनसंख्या मन्त्रालयअन्तर्गत स्वास्थ्य बीमा बोर्डले सेवा प्रदायक स्वास्थ्य संस्थालाई अनावश्यक रूपमा बिरामीलाई रिफर (प्रेषण) नगर्न कडा निर्देशन दिएको छ।
बोर्डको नीति, योजना तथा अनुगमन शाखाबाट जारी गरिएको पत्रमा आफ्नै संस्थामा उपलब्ध सेवा हुँदाहुँदै पनि अन्यत्र रिफर गरिएको पाइएकाले यस्तो अभ्यास तुरुन्त रोक्न आग्रह गरिएको छ ।
स्वास्थ्य बीमा ऐन २०७५, स्वास्थ्य बीमा नियमावली २०७५ तथा प्रेषण कार्यविधि २०८० विपरीत अनावश्यक रिफर गर्ने संस्थामाथि आवश्यक कारबाही हुने चेतावनीसमेत दिइएको छ।
पत्रमा भनिएको छ, ‘सेवा प्रदायक स्वास्थ्य संस्थाले आफ्नै संस्थामा उपलब्ध सेवा उपेक्षा गरी अनावश्यक रूपमा अन्यत्र बिरामी पठाउनु स्वास्थ्य बीमा प्रणालीको मर्म विपरीत हो । यस्ता क्रियाकलापका कारण बीमित सेवाग्राहीलाई अनावश्यक दुःख, खर्च र झन्झट हुने गरेको छ ।’
बोर्डले आफ्नै संस्थामा उपलब्ध सेवा भएमा सोही संस्थामै गुणस्तरीय र समयमै सेवा उपलब्ध गराउन, रिफर गर्नै पर्ने अवस्थामा नजिकको स्वास्थ्य संस्थामा मात्रै पठाउन अनुरोध गरेको छ ।
साथै, अनावश्यक रिफर गरेको पाइएमा दाबी मूल्यांकन तथा भुक्तानी रोकिने र सम्झौता स्थगन वा खारेजसम्मको निर्णय हुन सक्ने उल्लेख गरिएको छ।
वरिष्ठ मेडिकल सुपरिटेन्डेन्ट डा.पवन कुमार साहको हस्ताक्षरसहित जारी पत्रमा सूचना प्रविधि शाखालाई उक्त जानकारी स्वास्थ्य बीमा बोर्डको वेबसाइटमा प्रकाशन गर्न समेत निर्देशन दिइएको छ ।
सरकारको यो कदमले स्वास्थ्य बीमा सेवामा अनुशासन कायम गर्न र सेवाग्राहीलाई सहज तथा प्रभावकारी सेवा दिन सहयोग पुग्ने विश्वास गरिएको छ ।
प्रतिक्रिया दिनुहोस्